Bzavpress ||

نوسه‌ران

یاری ( PKK ) له‌ نێوان عاتیفه‌ی خه‌ڵك و موزایه‌ده‌ی سیاسیدا

شوان هەورامی

هه‌ر له‌ سه‌ره‌تاوه‌ ( PKK ) وه‌كو حیزبێكی ستالینیی چه‌پ خه‌باتی ده‌ست پێكرد ، به‌ هیچ شیضوه‌یه‌ك بڕوای به‌ هاوخه‌باتیی نه‌بووه‌ له‌گه‌ڵ هێزه‌ سیاسیه‌كانی باكووردا ، هه‌ر بۆیه‌ رێگه‌ی نه‌دا هیچ پارتێكی سیاسیی كوردانی باكوور خه‌بات بكه‌ن ، به‌ڵكو ده‌ستی كرد به‌ تیرۆری ئه‌وان و ناچاركردنیان به‌وه‌ی بچنه‌وه‌ شار و شاخ بۆ ئه‌و به‌جێ بهێڵن .
جگه‌ له‌وه‌ش ئه‌ندامانی ئه‌م پارته‌ هه‌میشه‌ له‌ هه‌ڵوێستی دژ به‌ یه‌كدا ژیاون ، له‌ فیكردا ماركسیه‌كی تووندڕه‌و بوون ، كه‌چی پرسی خه‌باتی نه‌ته‌وه‌ییان به‌رز كردۆته‌وه‌ ، له‌ كاتێكدا داوای دیموكراسی راسته‌قینه‌یان كردووه‌ و تا ئێستاش هه‌ر هه‌مان درووشم به‌رز ده‌كه‌نه‌وه‌ ، كه‌چی بڕوایان به‌وه‌ نیه‌ هیچ پارتێكی سیاسیی تر له‌ گۆڕه‌پانی باكووردا قبوڵ بكه‌ن ، ئه‌مه‌ له‌ رابردوودا به‌ خوێنی حیزبه‌ كوردییه‌كان و كادیرانیان نه‌خشاندوویانه‌ ، ئێستاش هه‌ر هه‌مان بیروبۆچوونیان هه‌یه‌ - ئه‌م بنه‌مایه‌ هه‌موو باڵه‌كانیان له‌ خۆرهه‌ڵات و خۆرئاواش ده‌گرێته‌وه‌ - كه‌ هه‌ر ئێستا له‌ خۆرئاوادا دیكتاتۆریه‌تیان له‌ كه‌س شاراوه‌ نیه‌ ، یا له‌ كاتێكدا درووشمی سه‌ربه‌خۆیی كوردستانیان به‌رز كردبووه‌وه‌ ، بووبوونه‌ هاوپه‌یمانی رژێمی به‌عس له‌ سوریا كه‌ به‌ هیچ شێوه‌یه‌ك بڕوای به‌ مافی كورد نه‌بووه‌ و كوردانی خۆرئاوا به‌ ئاواره‌ی ره‌زا قورس ناو ده‌بات و ئێستاشی له‌گه‌ڵدا بێت دان به‌ بوونیاندا نانێت ، كه‌چی (PKK ) و باڵه‌كانی هه‌ر هاوپه‌یمانی ئه‌و رژێمه‌ن . ئه‌م پارته‌ رۆژانه‌ هه‌ڕه‌شه‌ له‌ توركیا ده‌كات بۆ هه‌ڵگیرسانه‌وه‌ی شه‌ڕ ، له‌ كاتێكدا توركیا له‌ هه‌موو پارچه‌كانی تر زیاتر له‌ كورد هاتۆته‌ پێشه‌وه‌ ، كه‌چی بووه‌ته‌ هاوپه‌یمانی تاران و دیمه‌شق كه‌ هیچ بڕوایه‌كیان به‌ مافی كورد نیه‌ .
نه‌ك هه‌ر ئه‌وه‌ش هه‌رچی نه‌یاری رژێمی ( به‌شار ئه‌سه‌د ) ه‌ له‌ خۆرئاوا ، یا تیرۆریان كردن یا له‌ زیندانه‌كاندان یا ده‌ركراون بۆ ده‌ره‌وه‌ی وڵات ، كه‌ ئێستا جگه‌ له‌ هه‌ندێ پارتی كارتۆنی نه‌بێت هیچ پارتێكی راسته‌قینه‌ی كورد له‌ كانتۆنه‌كانی خۆرئاوادا بوونیان نیه‌ .
سه‌ركردایه‌تیی (PKK ) و باڵه‌كانی پێشتر به‌ كاركردن له‌سه‌ر عاتیفه‌ی نه‌ته‌وه‌یی خه‌ڵك كاری زۆریان كردووه‌ ، به‌ تایبه‌تی پرسی سه‌ربه‌خۆیی ، به‌ڵام ئه‌مڕۆ به‌ روونیی بۆشیی ئه‌و درووشمه‌یان ده‌رده‌كه‌وێت چونكه‌ ئێستا ده‌ڵێن ده‌بێ له‌ چوارچێوه‌ی پرسی دیموكراسیی خۆرهه‌ڵاتی ناوه‌ڕاستدا كوردیش به‌ مافه‌كانی بگات ، هه‌ر ئه‌وه‌شه‌ ناوی كوردستانییان له‌ كانتۆنه‌كانی خۆرئاوا نه‌ناوه‌ ، به‌ڵكو كانتۆنه‌كان كارگێڕین و بۆ پڕكردنه‌وه‌ی بۆشایی ئیدارین ، ئه‌مه‌ش بۆ ئه‌وه‌ی دڵی هاوپه‌یمانه‌كانیان له‌ دیمه‌شق و تاران رابگرن ، له‌ كاتێكیشدا كه‌ ئه‌وان باسی مافی گه‌لی كورد ده‌كه‌ن تێكه‌ڵی هاوپه‌یمانیه‌تیه‌ك بوون ، كه‌ شیعیی و عه‌له‌وییه‌ و زۆر تووندڕه‌وانه‌ پشتیوانیی لێ ده‌كه‌ن . چونكه‌ سه‌ركردایه‌تی ئێستای (PKK ) له‌ ده‌ستی عه‌له‌وییه‌كاندایه‌ و ئه‌وان له‌ چوارچێوه‌ی به‌رژه‌وه‌ندیی تائیفه‌ی عه‌له‌ویدا بیرده‌كه‌نه‌وه‌ ، بۆیه‌ به‌ هه‌موو شتێكی دیمه‌شق و تاران رازین و دژایه‌تی هه‌موو شتێكی ئه‌نقه‌ره‌ش ده‌كه‌ن ، باوه‌كو زۆریش له‌ كورد هاتبێته‌ پێشه‌وه‌ .
ئه‌م حیزبه‌ توركیایان به‌وه‌ تۆمه‌تبار ده‌كرد كه‌ لایه‌نگری داعشه‌ و دژی كورده‌ ، به‌ڵام كاتێ توركیا به‌ جدیی و به‌ به‌رنامه‌وه‌ ده‌چێته‌ ناو هاوپه‌یمانێتیه‌كه‌ (PKK ) و هاوپه‌یمانه‌كانی تووڕه‌ كردووه‌ ، چونكه‌ توركیا ده‌یه‌وێت ناوچه‌ی دژه‌ فڕین به‌سه‌ر رژێمی سوریادا بسه‌پێنێت ، ناوچه‌یه‌كی ئارام بۆ ئاواره‌كان دروست بكات و له‌وێشدا ئۆپۆزیسیۆنی سوریا چه‌كدار بكرێت بۆ به‌رنگاریی رژێمی به‌عس و دوا جار رووخاندنی چونكه‌ به‌وه‌ پێگه‌ی توركیا به‌هێز ده‌بێت ، بێگومان به‌ هه‌مان شێوه‌ش پێگه‌ی هاوپه‌یمانه‌كانی به‌عسی سوریاش له‌و پڕۆژه‌یه‌دا نابێت ، به‌ تایبه‌تی (PKK ) و باڵه‌كانی ئۆپۆزیسیۆن نین ، بۆیه‌ زۆر له‌م پڕۆژه‌یه‌ی توركیا ده‌ترسن !!
توركیا مه‌رجی هه‌یه‌ بۆ ئه‌وه‌ی به‌شداریی له‌ هاوپه‌یمانێتیه‌كه‌دا بكات ، كه‌ دوا مه‌رجی ئه‌وه‌یه‌ دوای شه‌ڕی داعش رژێمی سوریاش بڕوخێنن ، كه‌ ئه‌وه‌ بۆ (PKK ) و هاوپه‌یمانه‌كانی به‌ كاره‌سات هه‌ژمار ده‌كرێت ، چونكه‌ سه‌ركردایه‌تی عه‌له‌ویی (PKK ) له‌ چوارچێوه‌ی به‌رژه‌وه‌ندیی ئه‌و تایه‌فه‌یه‌ بیر ده‌كاته‌وه‌ نه‌ك كورد و به‌رژه‌وه‌ندییه‌كانی .
ئه‌م پارته‌ بۆ كاركردن له‌سه‌ر عاتیفه‌ و سۆزی نه‌ته‌وایه‌تی باسی ئه‌وه‌یان ده‌كرد كه‌ ئه‌گه‌ر ئه‌وان نه‌بونایه‌ داعش هه‌موو كوردستانی داگیر ده‌كرد ، به‌ڵام كاتێ داعش له‌ خۆرئاوا هێرش ده‌كات ، هاواری لێ به‌رز ده‌بێته‌وه‌ ، جارێك به‌ ئه‌نفالی ناو ده‌بات و جارێكی تریش به‌ تراژیدیای كۆبانێ ناوزه‌دی ده‌كات ، داوای هاوكاریی له‌ كوردانی پارچه‌كانی تر ده‌كات به‌ڵام به‌ هیچ شێوه‌یه‌ك ئاماده‌ نیه‌ پێشمه‌رگه‌ی پارچه‌كانی تر و حیزبه‌كانی تر قبوڵ بكات ، ته‌نیا باڵه‌كانی خۆی له‌و پارچانه‌دا به‌ پێشمه‌رگه‌ ده‌زانێت . ئه‌وه‌تا له‌م هه‌لومه‌رجه‌ ترسناكه‌ی كه‌ زیاتر له‌ ( 140.000 ) كوردی خۆرئاوا ئاواره‌ی توركیا بوون ، ساڵح موسلیمی هاوسه‌رۆكی په‌یه‌ده‌ مافی په‌نابه‌ریی له‌ فینله‌ندا وه‌رده‌گرێت و " سینه‌م موحه‌مه‌د " ی هاوسه‌رۆكی گه‌لی رۆژئاوای سه‌ر به‌ (PKK ) یش هه‌مان داوای داوه‌ته‌ حكومه‌تی فینله‌ندا ، چونكه‌ وڵاتانی تری ئه‌وروپا داواكه‌یان ره‌تكردبوونه‌وه‌ ، ئایا شۆڕشگێڕ له‌ كاتی ته‌نگانه‌دا گه‌ل و هاوسه‌نگه‌رانی له‌ گۆڕه‌پانی جه‌نگدا به‌ ته‌نیایی به‌جێ ده‌هێڵێت ؟!
جه‌میل بایك هه‌ڕه‌شه‌ی شه‌ڕ هه‌ڵگیرسانه‌وه‌ له‌ توركیا ده‌كات ، به‌ مه‌رجێ دوای وه‌ستانی شه‌ڕ زۆربه‌ی گونده‌كانی باكوور ئاوه‌دان كراونه‌ته‌وه‌ و بووژانه‌وه‌یه‌كی ئابووریی ناوچه‌كه‌ی گرتۆته‌وه‌ ، ئایا جگه‌ له‌ پاشه‌كشه‌ كردن به‌ پرۆسه‌ی ئاشتیی و بووژانه‌وه‌ی ئابووریی كوردستان ئه‌و شه‌ڕه‌ چ سوودێك به‌ كورد ده‌گه‌یه‌نێت كه‌ له‌ رابردوودا ئه‌و شه‌ڕه‌ی تاقیكردووه‌ته‌وه‌ ، ئه‌و شه‌ڕه‌ ته‌نیا ئه‌و نه‌یارانه‌ی توركیا قازانجی لێ ده‌كه‌ن ، كه‌ به‌ هیچ شێوه‌یه‌ك بڕوایان به‌ مافی چاره‌نووسی گه‌لی كورد نیه‌ .
ئه‌م ره‌فتاره‌ دژ به‌ یه‌كانه‌ی (PKK ) پێگه‌ی ئه‌و پارته‌ی له‌ناو پارچه‌كانی تری كوردستاندا بێهێز كردووه‌ ، به‌ڵام له‌گه‌ڵ ئه‌وه‌شدا ئه‌وان خزمه‌ت به‌ هاوپه‌یمانێتیی شیعیی – عه‌له‌ویی ده‌كه‌ن ، به‌رده‌وامن له‌ چه‌واشه‌كردنی چین و توێژه‌كانی كورده‌واریی له‌وه‌دا عاتیفه‌ی نه‌ته‌وه‌ییان به‌كار ده‌هێنن بۆ ئه‌وه‌ی ئه‌نجامی شوومی هاوپه‌یمانێتیه‌كه‌یان بشارنه‌وه‌ . كه‌ ئێستا له‌ كوردستاندا هاوپه‌یمانانی دیمه‌شق و تاران په‌رێزیان دیاره‌ و بوونه‌ته‌ سه‌روكڵاوی یه‌كتر

به‌روار: 03/10/2014

بینین: 1569