Bzavpress ||

نوسه‌ران

پڕۆژه‌ی مه‌رگ و ژیان !!

شوان هەورامی

خودا مرۆڤی بۆ ئاوه‌دانكردنه‌وه‌ و ژیان ناردووه‌ته‌ سه‌ر زه‌وی ، هه‌روه‌كو به‌ فریشته‌كانی فه‌رموو : من ده‌مه‌وێ بریكارێك له‌سه‌ر زه‌وی دیاریی بكه‌م ، فریشته‌كان گوتیان : تۆ كه‌سێ دێنی له‌وێدا خراپه‌ بكا و خوێن بڕێژێ . به‌ڵام خودا تایبه‌تمه‌ندیی ئه‌م بریكاره‌ی به‌وان نیشاندا و ئه‌وان ته‌سلیمی ئیراده‌ی په‌روه‌ردگار بوون . به‌ڕاستی مرۆڤی رێز لێگیراو ده‌توانێت زه‌وی بگه‌یه‌نێته‌ قۆناغێ كه‌ بۆنی به‌هه‌شتی لێ بێت ، ئه‌ویش به‌ چه‌سپاندنی دادگه‌ریی و یه‌كتر ناسین و پێكه‌وه‌ ژیان و هاریكاریی یه‌كتر ، به‌ڵام مه‌خابن مرۆڤی لاده‌ر له‌و مه‌به‌سته‌ی كه‌ بۆی ره‌وانه‌ كراوه‌ ، ده‌بێته‌ دڕنده‌یه‌كی ترسناك و ژیان ده‌كاته‌ ژه‌هر و پڕی ده‌كات له‌ خراپه‌كاریی و كوشتن و كاولكاریی ، كه‌ ئه‌م كارانه‌ی مرۆڤ پێچه‌وانه‌ی میهره‌بانیی خودایه‌ كه‌ ئه‌و هه‌موو پێغه‌مبه‌رانه‌ی بۆ رێنمایی ئه‌و ناردووه‌ ، تا له‌ ئامانجه‌كه‌ی لا نه‌دات ، به‌ڵام مه‌خابن مرۆڤی لاده‌ر له‌ هه‌ر قۆناغێكی مێژووییدا زه‌وی به‌ره‌و وێرانكاریی ده‌به‌ن نه‌ك ئاوه‌دانیی و دادگه‌ریی و ژیاندۆستیی .
ئێمه‌ لێره‌دا گله‌ییمان له‌وانه‌ نیه‌ كه‌ به‌ ئاشكرا دیاره‌ به‌هۆی قوتابخانه‌ فیكرییه‌كانیانه‌وه‌ سته‌م له‌ هه‌موو مرۆڤایه‌تیی ده‌كه‌ن ، نه‌هامه‌تیه‌كانی ئیستیعمار و جه‌نگه‌ جیهانیه‌كان و ره‌شه‌كوژییه‌كان و به‌ كۆیله‌كردنه‌كان ، ده‌رهاویشته‌ی ئه‌و قوتابخانه‌ فیكرییانه‌ن كه‌ جیهانی چینایه‌تییان هێناوه‌ته‌ كایه‌وه‌ ، ئه‌وه‌ نیه‌ جیهانی یه‌كه‌م و دووه‌م و سێیه‌می ئابوورییان دروست كردووه‌ و مرۆڤه‌كانیان پله‌ به‌ندیی كردووه‌ ، كه‌واته‌ ئه‌م جۆره‌ بیركردنه‌وانه‌ له‌ پۆلێن كردنی نرخی مرۆڤه‌كان هه‌ر له‌ بناغه‌وه‌ هه‌ڵه‌ن ، بۆیه‌ ئه‌و جۆره‌ هه‌ڵانه‌ پێویستیان به‌ رێشه‌كێش كردن هه‌یه‌ ، مرۆڤ زۆر گه‌وره‌تره‌ له‌ ماده‌ ، تا به‌و شێوه‌یه‌ مامه‌ڵه‌ی له‌گه‌ڵدا بكرێت . نیگه‌رانیی ئێمه‌ له‌وه‌یه‌ مرۆڤێ كه‌ ئیدیعای ئه‌وه‌ بكات كه‌ له‌ بریكار بوونی خودایی تێگه‌یشتووه‌ به‌ڵام هیچ ره‌فتارێكی ناچێته‌وه‌ سه‌ر ئه‌و ئامانجانه‌ی كه‌ خودا لێی داوا كردووه‌ . خودا فه‌رمان به دوا‌ پێغه‌مبه‌ر ( صلی الله علیه وسلم ) ده‌كات كه‌ ته‌نیا بۆ ئه‌وه‌ نێردراوه‌ كه‌ ره‌حمه‌ت و به‌زه‌یی بێت بۆ مرۆڤه‌كان ( وما أرسلناك إلا رحمة للعالمین ) ، به‌مرۆڤه‌كانیشی فه‌رمووه‌ : به دڵنیایی پێغه‌به‌ری خودا سه‌رمه‌شقی چاكه‌ بۆ ئێوه‌ و هه‌ركه‌سێ كه‌ به‌ خودا و رۆژی دوایی هیواداره‌ و خه‌ریكی یادی خودایه‌ ( لقد كان لكم في رسول الله أسوة حسنة لمن كان يرجو الله واليوم الآخر وذكر الله كثيرا ) ، ئه‌و پێغه‌مبه‌ره‌ هه‌موو ژیانی به‌سه‌ر برد بۆ چه‌سپاندنی دادگه‌ریی و ژیانی ئارام و ئاسووده‌یی مرۆڤه‌كان و یه‌كتر خۆشویستنیان ، به‌ڵام مه‌خابن هه‌ندێ جار كه‌چڕه‌ویی یا تیژڕه‌ویی و په‌ڕگیریی هه‌ندێ كه‌س له‌ تێگه‌یشتنیان بۆ ده‌قه‌ ئاینیه‌كان ، رووداوی دڵته‌زێنی لێكه‌وتووه‌ته‌وه‌ ، جا هه‌روه‌كو چۆن لادانی شوێنكه‌وتوانی پێغه‌مبه‌رانی پێشوو ( علیهم السلام ) خراپه‌كاریی لێكه‌وتووه‌ته‌وه‌ ( یا أهل الكتاب لا تغلوا فی دینكم ) ئه‌و فه‌رمانه‌ ئێمه‌ی شوێنكه‌وتووی په‌یامبه‌ری ئیسلامیش ده‌گرێته‌وه‌ ، كه‌ زیاده‌ڕه‌ویی و په‌ڕگیریی ئاینیی بریتیه‌ له‌ لادان و دووركه‌وتنه‌وه‌ له‌ بنه‌ماكانی دین و به‌وه‌ش ژین تێكده‌چێت .
ئیسلام له‌ شارستانیه‌تی خۆیدا به‌رزترین نمونه‌ی ژیاندۆستی پێشكه‌ش كردووه‌ ، ئه‌م وته‌یه‌ مێژوو نوسه‌ به‌ویژدانه‌كانی ئه‌وروپاش ئاماژه‌یان پێداوه‌ ، به‌ تایبه‌تی دوای ئه‌وه‌ی نووری زانستی موسوڵمانان له‌ ئه‌نده‌لوسه‌وه‌ ئه‌وروپای رووناك كرده‌وه‌ و بووه‌ هۆی سه‌رهه‌ڵدانی شۆڕشی رێنیسانس و رۆشنگه‌ریی ، كه‌واته‌ ئه‌وه‌ی ئێستا له‌ ناوچه‌كه‌دا روو ده‌دات ئه‌و نه‌خۆشیه‌ ترسناكه‌یه‌ كه‌ دینه‌كانی تری تووشی زه‌مینگیریی و راوه‌ستان كردووه‌ ، كه‌ هه‌ندێ په‌ڕگیر ده‌یانه‌وێت ئیسلامیش تووشی ئه‌وه‌ بكه‌ن . له‌و كاته‌وه‌ كه‌ شۆڕشی وه‌هابیه‌ت له‌ نه‌جد و حیجاز سه‌ری هه‌ڵدا ، گه‌وره‌ترین مه‌ترسیی رووی كرده‌ جیهانی ئیسلامیی ، به‌ تایبه‌تی دوای ئه‌وه‌ی وه‌هابیه‌ت و ئالی سعود بوونه‌ هاوپه‌یمانی یه‌كتر و بوونه‌ دووباڵی سیستمێكی نوێ له‌ ناوچه‌یه‌كی هه‌ستیاری جیهانی ئیسلامیدا ، به‌ تایبه‌تی تریش دوای ئه‌وه‌ی سعودیه‌ یه‌ده‌كێكی گه‌وره‌ی نه‌وتی تێدا دۆزرایه‌وه‌ و بووه‌ یه‌كێك له‌ گه‌وره‌ترین به‌رهه‌مهێنه‌رانی نه‌وت له‌ ناوچه‌كه‌دا ، ئیتر ساڵانه‌ ملیاره‌ها دۆلار بۆ دامه‌زراوه‌ی دینیی وه‌هابیه‌ت خه‌رج ده‌كرێت و سیاسه‌تی سعودیه‌ش ئه‌وه‌یه‌ كه‌ دژایه‌تی هه‌ر بزووتنه‌وه‌یه‌كی ئیسلامیی ره‌سه‌ن ده‌كات كه‌ له‌گه‌ڵ دیدوبۆچوونی دینیی ئه‌واندا ناگونجێت ، هه‌ر بۆیه‌ ده‌بینین دوای شۆڕشی عه‌ره‌بی سعودیه‌ و دامه‌زراوه‌ دینیه‌كه‌ی ملیاره‌ها دۆلاریان خه‌رج كردووه‌ بۆ دژایه‌تی هیواو ئاواتی گه‌لانی ناوچه‌كه‌ ، كه‌ مه‌خابن ئه‌م سیاسه‌ته‌ و چاوچنۆكیی و پیلانی جیهانی سه‌رمایه‌داریی و په‌ڕگیریی به‌شێكی گه‌وره‌ له‌ شیعه‌كان ئه‌م ناوچه‌یه‌ی كردووه‌ته‌ كووره‌یه‌كی گڕ گرتوو ، كه‌ كه‌س نازانێت ئه‌م كاولكارییه‌ به‌ره‌و كوێ ده‌ڕوات .
وه‌هابیه‌ت ( سه‌له‌فیه‌ت ) و به‌ تایبه‌تی داعش كه‌ ده‌رهاویشته‌یه‌كی ئاسایی ئه‌و جۆره‌ بیركردنه‌وه‌ په‌ڕگیره‌یه‌ له‌ ئیسلام ، بریتیه‌ له‌ خۆكووژیی و دوور كه‌وتنه‌وه‌ له‌ گیانی دین ، ئه‌مانه‌ چاك ده‌زانن بمرن و ژیان بكوژن ، ئه‌مانه‌ ده‌یانه‌وێت شارستانیه‌ت بڕوخێنن و ژین و ژیان بكه‌نه‌ تاریكستان ، به‌ڵام تروسكاییه‌ك بۆ ژیان له‌ په‌یڕه‌وی ئه‌واندا نابینرێت ، هه‌ر ئه‌و جۆره‌ بیركردنه‌وه‌یه‌ وایكردووه‌ ئه‌م جۆره‌ بیركردنه‌وه‌یه‌ له‌ هه‌ر شوێنێ دروست بووبێت له‌ ماوه‌یه‌كی كورتدا خه‌ڵكی بێهیوا كردووه‌ ، له‌ كاتی هه‌ره‌سهێنانی هێزه‌كانی مالیكی له‌ موسڵدا خه‌ڵكی وه‌كو جه‌ژن ئاهه‌نگیان گێڕاو پێشوازییان له‌ چه‌كداره‌كان كرد به‌ تایبه‌تیش داعش ، به‌ڵام دوای فه‌رمانه‌ سه‌یر و سه‌مه‌ره‌كانی داعش ئێستا خه‌ڵكی ئه‌و ناوچه‌یه‌ زیاتر له‌ سوپاكه‌ی مالیكی به‌ بوونی ئه‌و هێزه‌ بێزارن ، چونكه‌ هیچ په‌راوێزێكیان بۆ ژیانی خه‌ڵك نه‌هێشتووه‌ته‌وه‌ ، جگه‌ له‌وه‌ش شۆڕشی سێگۆشه‌ی سوننه‌ بۆ داخوازیی مافه‌كانیان خسته‌ ژێر پرسیار و تێكه‌ڵیان كرد به‌ شه‌ڕی دژه‌ تیرۆر و ئێستا ئه‌وان هه‌موو دونیایان له‌سه‌ر لێدانی سێگۆشه‌ی سوننه‌ كۆكرده‌وه‌ و شه‌ڕێكیشیان خوڵقاندووه‌ كه‌س نازانێت ئاكامه‌كه‌ی بۆ كوێیه‌ !!

به‌روار: 27/09/2014

بینین: 1465