Bzavpress ||

زەنگێک بۆ بێداربوونەوە لە غەفڵەت
تـــــــەرزە فائق

مەملەکەتی شەیتان, کتێبێ سێیەم, زنجیرەی ٧٣
ماکوان کەریم

مەلەکەتی شەیتان، کتێبی سێییەم، زنجیرەی ٦٩
ماکوان کەریم

نوسه‌ران

پەیامێك بۆ سەرۆكی هەرێم و هێزە سیاسییەكان

فاتیح سه‌نگاوی

هەرچەندە ئەم ماوەیە كەمتر ویستومە پۆست بنوسم بەڵام مرۆڤ كاتێ بێ ویژدانی دەوروبەرەكەی دەبینێ، ئەو كات بێ دەنگی جۆرێكە لە بێ هەڵوێستی، ئەو هەموو دەوڵەتۆچكەی كۆلۆنیالیزم و ئیستیعمار لەم ناوچەیەدا بۆ بەرژەوەندی خۆیان و بە بەپێی چەند رێككەوتنامەیەك بنیاتیان نان و قوتیان كردنەوە، ئێستە سەركردەكانیان لەئێمە بونەتە پارێزەری دین و دونیای خەڵكی و خەلیفەی مسوڵمانان و باس لە یەكڕیزی دەكەن و وەك ئەوەی نەخشەی وڵاتەكانی خۆیان خواكرد بێت و بە وەحیی خوایی دابەزیی بێت نەك وەحیی ئیستیعمار!!
لەو لاشەوە مالیكی هەڕەشە لە هەرێم دەكات وەك ئەوەی كوردستان و هاوڵاتیانی هەر لە ئەزەلەوە میراتییەكی ئەم عێراقە ناچیزەیە بن و جیابونەوە لێی تاوانێكی دینی و مێژویی گەورەبێ و دەستخۆشی لە سیسی خوێن رێژ دەكا چونكە هاوسۆزی دەربڕیوە بۆ یەكێتی عێراق و خاكەكەی، ئەو عێراقەی هەر لە سەرەتاوە بەبێ رەزامەندی ئێمە بە ویستی زلهێزانێكی وەكو بەریتانیا و فەڕەنسا ئێمە بوین بەبەشێك لێی، هەر بە پێی ئەو پەیماننامەیەی ئەو كات بۆ لكاندنی ولایەتی موصل بە عێراقی عەرەبییەوە لە ئارادابوو، دەبوو ئێمە هەر لە شەستەكانەوە جیابونەوەی خۆمان رابگەیاندایە، چونكە مەرجەكانی پێكەوە ژیان و بەدیهێنانی مافەكان هەر لەسەرەتاوە ژێر پێ خران ...
ئێستەش ئەو دەرفەتە مێژوییەیە كە نابێ كورد لە دەستی بدا و پێویستە بە چەند رێ و شوێنێك ئەو خواستە سروشتی و خەونە رەوایەی بەدی بهێنێ:
1- پێویستە كورد بە هەموو هێزە سیاسییەكانییەوە یەك دەنگ و یەك هەڵوێًست بن و لە پێناو خواستی سەربەخۆییدا سازش لەگەڵ یەك بكەن، هەر كەم و كورتیی و كەمتەرخەمییەك لەكەیەكی گەورە و پەڵەیەكی دیار دەبێ بەناوچاوانی ئەو هێزەی لە ئێستادا هەماهەنگ نابێ و بە ئاماژەی هێزی تر جوڵە دەكا و هەلًَوێست وەردەگرێ، نەك بەرژەوەندی خەڵكی كوردستان.
2- نابێ كەس حۆی بكاتە تاكە پاڵەوانی ئەم كارە و ئەوانی تر پەراوێز بخا، بەڵكو دەبێ هەموان بەشدار و كاریگەر بن ورۆڵیان هەبێ لەم كارە چارەنوس سازەدا.
3- پشاوانی نێو دەوڵەتی زۆر گرنگە و دەبێ پێشتر و ئێستاش كار كرابێ و بكرێ بۆ ئەو پشتیوانییە بەتایبەت توركیا و وڵاتانی ئەوروپی و بێ لایەن كردنی ئێران ئەوەندەی لە توانادایە.
4- ئەنجام دانی ریفراندۆم لە ناوچە كوردستانییەكانی دەرەوەی هەرێم بەشێوازێك بكرێ كە بتوانرێ شەرعییەتێكی یاسایی هەبێ و شەفافییەتی تەواوی تێدا بەرجەستە بێ و بانگهێشتی نەتەوە یەكگرتووەكان و رێكخراوە نێودەوڵەتییەكان بكرێ، یاخود ئەوان سەرپەرشتی كەن بە هاوكاری و ئاسانكاریی حكومەتی هەرێم ولەم پرۆسەیەشدا ناوچە گەلێكی وەكو حەویجە و ناحییەكانی پشتگوێ خرێن، لەبەر ئەوەی هەم لە ژێر ركێفی كورددا نییە و بۆ داهاتوش دەبێتە نیگەرانی و سەر ئێشەی بەردەوام.
5- هەموو رێكارێك بگیرێتە بەر بۆ دڵنیاكردنەوەی نەتەوە و ئاین و ئاینزاكانی ئەو ناوچانە بەوەی سود و بەرژەوەندی ئەوان لەوەدایە كە لەگەڵ گەلی كوردستان و هەرێمەكەیدا بن نەك عێراق و بۆ ئەوەش گرەنتیان پێ بدرێ بە رێككەوتننامەی فەرمی و هەمواركردنی دەستور و بەشداری كارا و جیدی لە حكومەتی مەحەللی و حكومەتی هەرێمی كوردستاندا.
6- لە دوای یەكلابونەوەی ئەم پرسە گشت پرسییەك بكرێ بۆ سەربەخۆیی هەرێمی كوردستان و راگەیاندنی دەوڵەت، ئەم راپرسییە هەر دەبێ بكرێ ئەگەر لە ئێستاشدا تەواوی ئامانجەكانی خۆیشی نەپێكێ.
7- راگەیاندنی دەوڵەت باجی زۆرە و ماوەیەكیش لە بارێكی ناهەمواردا دەبین بەڵام هیچ كات باجەكەی قورستر نابێت لەوەی لەگەڵ عێراقێكی تائیفەگەری و هۆزگەرایی و نەتەوەپەرستیدا بین و هەر ماوە ناماوە گەڕێكمان پێ دەگێڕن و كارەساتی نەخوازراو جەرگ بڕ چاوەڕوانمان دەكا.
8- هەموو ئەمانەی وتمان مافی سروشتی و سەرەتایی خۆمانە و بە هەموو یاسا و رێسایەكی ئاسمانی و زەمینی كارێكی رەوا و خواستێكی شەرعییە و ناكرێ كەمتەرخەم بین لە ئاستیدا.
هیوادارم لە نزیكترین كاتدا بەو خواستە رەوا و خەونە شەرعیەی خۆمان بگەین و لە داهاتوشدا بتوانین نمونەی دەوڵەتێكی دادخواز و خەڵك ویستی پڕ لە ئاشتی و ئارامی و خۆشگوزەرانیی بۆ گەلی كوردستان بەدی بهێنین.

به‌روار: 12/07/2014

بینین: 1555