Bzavpress ||

نوسه‌ران

پاشخان ئیسلامییه‌كان و ره‌خنه‌ له‌ دیدی ئیسلامی

فاتیح سه‌نگاوی

زۆرن ئه‌و رۆشنبیره‌ ئیسلامیانه‌ی سه‌رقاڵی ره‌خنه‌ن له‌ ئیسلامییه‌كان و مێژوی ئیسلامی و ئه‌زمونه‌ ئیسلامییه‌كان و خوێندنه‌وه‌ی ده‌قه‌كان و تا راده‌ی سفركردنی سه‌رچاوه‌ی دوه‌می ئیسلام كه‌ سوننه‌یه‌ به‌ڵام ئه‌مانه‌ زۆرجار ته‌نها سه‌رقاڵی قسه‌ی توانج ئامێزن و نابینین به‌دیلێكی زانستی و عه‌مه‌لی و ژیاری نوێ و رێ و شوێنێكی باشتر بخه‌نه‌ پێش چاوو، زۆرجار به‌م كارانه‌یان ده‌یانه‌وێ ئه‌زمونی ئیسلامی بێ نمود و ناشیرین كه‌ن و متمانه‌یه‌كی بۆ نه‌هێڵنه‌وه‌ ...
جا ئه‌گه‌ر ئه‌و به‌ڕێزانه‌ به‌دیلێكی باشتریان پێیه‌ ده‌ی بفه‌رمون با ته‌رحی كه‌ن و تیۆریزه‌ی كه‌ن و پاشتریش كاری جدی بۆ بكه‌ن له‌ زه‌مینه‌ی واقعدا به‌ڵام ئه‌گه‌ر ته‌نها ئه‌و جۆره‌ قسانه‌یه‌ و هیچی دی ئه‌وه‌ به‌ڕێزان: دڵنیابن زۆر له‌وه‌ زیاتر لای بیرمه‌ند و رۆشنبیره‌ عه‌ره‌به‌كان ده‌بینین و ئه‌وه‌ی ئێوه‌ ته‌نها ته‌قلید و چاولێكه‌رییه‌ ... گه‌ر ئێوه‌ له‌ دڵسۆزیتان بۆ ئیسلام ئه‌مه‌ ده‌كه‌ن ده‌بێ قوڵتر و عه‌مه‌لی تر بێنه‌ مه‌یدان و تۆزێ زیاتر خۆ ماندوو كه‌ن و هه‌ندێ كاتی زیاتر بده‌نه‌ پرۆژه‌كانتان و بۆ ته‌ره‌فێكی عه‌قڵی و كات به‌سه‌ر بردن و ده‌ستت خۆش و ئه‌عجه‌به‌نی و لایك كار مه‌كه‌ن هه‌رچه‌نده‌ ئه‌وه‌ش كه‌س ناتوانێ رێتان لێ بگرێ ...
خۆ ئه‌گه‌ر متمانه‌شتان به‌ تێڕوانین و بیركردنه‌وه‌ی ئیسلام نه‌ماوه‌ بۆ ژیان و كۆمه‌ڵگه‌ و ...هتد ... پێویست به‌م شێر و رێوییه‌ ناكات و ئێستاش هێزی تر زۆره‌ خوازیارن ئه‌و كۆنه‌ ئیسلامییانه‌ بگرنه‌ خۆ له‌ پێناو به‌ده‌ست هێنانی متمانه‌ی جه‌ماوه‌ر و جوان كردنی خۆیاندا چونكه‌ په‌روه‌رده‌ و پێگه‌یاندنی ئیسلامییه‌كان زۆر ره‌فتاری جوانی تێدا هێشتونه‌ته‌وه‌ و له‌وێش پۆست و پله‌و پایه‌یه‌كی باشتان بۆ به‌دی دێت و ده‌توانن پراگماتیكییانه‌ و دونیاییانه‌تر سیاسه‌ت بكه‌ن!!! واز له‌و فه‌قیر و فوقه‌رایه‌ بهێنن كه‌ له‌ هه‌موو لاوه‌ به‌چه‌ندین هاوكێشه‌ی جۆراوجۆر له‌ ئاستی دونیادا دژایه‌تییان ده‌كرێ و ناچار به‌ توندڕه‌وی ده‌كرێن و دواتر ده‌بنه‌ ئیرهابی و ئیتر ئیشكاله‌ ناوخۆیی و خواسته‌ ناشه‌رعی و ململانێی نادروستی تر كه‌ توشی ئه‌مانیش ده‌بێ له‌ولاوه‌ بوه‌ستێ ...
تێگه‌یشتنی ئێستای ئیسلامییه‌كان و ئه‌زمونه‌ پراكتیكییه‌كانیان و بیركردنه‌وه‌ی فیقهی و هتدیان ... هه‌ڵه‌ و كه‌م و كوڕی زۆری تێدایه‌ به‌ڵام پێویستی به‌ كه‌سانێك هه‌یه‌ دڵسۆزانه‌ نه‌شته‌رگه‌ری كات و نه‌یه‌وێ بیكوژێ و ژیانی بۆ بگه‌ڕێنێته‌وه‌ .... نه‌ك به‌ناوی چاره‌سه‌ره‌وه‌ ژه‌هری ده‌رخوارددا و به‌ناوی پێدانی وزه‌وه‌ پڕزه‌ی لێ ببڕێ ...

به‌روار: 23/12/2013

بینین: 1974