Bzavpress ||

نوسه‌ران

بزانه‌ ئیسلام رێگه‌ی داوه‌ مرۆڤ به‌كۆیله‌ بكرێ؟

فاتیح سه‌نگاوی

له‌ هیچ شوێنیكدا خوای گه‌وره‌ نه‌یفه‌رموه‌، خه‌ڵكی بكه‌نه‌ كۆیله‌ و كه‌نیزه‌ك به‌ڵام له‌چه‌ندین شوێندا ئازادكردنی كۆیله‌ی به‌ چاكه‌یه‌كی گه‌وره‌ و ئه‌ركێكی دیندارانه‌ داناوه‌(ئازادكردنی كۆیله‌ له‌ بری:كوشتنی هه‌ڵه‌ و زیهار و سوێن شكاندن و جوتبون له‌ ره‌مه‌زان و داوای ئازادكردن به‌ بریتی، هاندانی ئازادكردن وه‌ك گه‌وره‌ترین چاكه‌،...)، ئیسلام وه‌كو دین ده‌رگاكانی ئازادكردنی كۆیله‌كانی خسته‌ سه‌رپشت، چاره‌سه‌ری دانا بۆ وشككردنی سه‌رچاوه‌كانی كۆیله‌یه‌تی و به‌ كۆیله‌كردن ... هه‌موو ئه‌مانه‌ رێگه‌ی ئازادكردنی كۆیله‌ن به‌ شێوازێكی پله‌ به‌ند، به‌پێی ده‌قی ئاشكرای قورئانیش دیلی جه‌نگ ناكرێ به‌ كۆیله‌ و ئه‌وه‌ی له‌سه‌ره‌تای ئیسلامدا هه‌بوه‌ ته‌نها مامه‌ڵه‌كردن بوه‌ له‌گه‌ڵ واقعێكی سه‌پاوو باوو، كه‌ ده‌بوو مسوڵمانان نه‌یهێڵن، به‌ڵام ئه‌وه‌ی دواجار له‌ مێژوودا سه‌پا روحی ده‌ققه‌كان نه‌بوو، واقعی زاڵی ئه‌و كاته‌ی مێژوو بوو، كه‌ تا سه‌ره‌تای سه‌ده‌ی بیسته‌میش له‌هه‌موو جیهاندا باو بوو، ئایه‌ته‌كانی(أو ما ملكت أیمانهم)، بۆ چاره‌سه‌ری ئه‌و واقعه‌ی سه‌ره‌تای ئیسلام و هه‌ر واقعێكه‌ كه‌ رێگه‌ چاره‌یه‌كی تر نه‌بێ، نه‌ك ته‌شریع و یاسایه‌كی ئه‌زه‌لی و واجب ، ئه‌و ئایه‌تانه‌ كارپێكردنیان ده‌وه‌ستێنرێن-هه‌روه‌ك د.زه‌ڵمی ده‌فه‌رموێ- له‌به‌ر ئه‌وه‌ی كۆیله‌و كه‌نیزه‌ك كۆتایی پێ هاتوه‌. ئه‌و ئایه‌تانه‌ بۆ چاره‌سه‌ری ئه‌ واقعه‌ دابه‌زێنراون هۆكاری كار پێكردنیان نه‌ماوه‌ ...
كاتێكیش هه‌موو گه‌لانی جیهان گه‌یشتنه‌ ئه‌و ده‌ره‌نجامه‌ی ده‌بێ مرۆڤ به‌ كۆیله‌ نه‌كرێ، له‌ ئاوه‌ها كاتێكدا مسوڵمانان ده‌بێ له‌وانیتر زیاتر ئه‌م داخوازییه‌ ره‌وایه‌ پیاده‌ بكه‌ن و دژایه‌تی هه‌موو جۆره‌كانی كۆیله‌یه‌تی بكه‌ن، چونكه‌ ئه‌سڵ له‌ هاتنی په‌یامبه‌ران و په‌یامی ئیسلامیشدا نه‌هێڵانی كۆیله‌یه‌تییه‌ نه‌ك به‌ كۆیله‌ كردن ...( جئنا نخرج العباد من عبادة العباد الى عبادة رب العباد), كاتێكیش بۆ سه‌رده‌م و هۆكارێكی تایبه‌ت ئیسلام رێگه‌ی به‌هاوسه‌رگیری كه‌نیزه‌كه‌كان داوه‌، ئه‌مه‌ ئه‌وه‌ ناگه‌یه‌نێ ئه‌و جۆره‌ زه‌واجه‌ فه‌زیله‌ت بێ و پێویست بێ به‌دی بهێنرێ، ته‌نانه‌ت هه‌ندێ شت هه‌ن له‌ ئیسلامدا فه‌رمان كراوه‌ به‌ پیاده‌كردنی و ده‌یان ئایه‌ت و سه‌دان فه‌رموده‌ی له‌سه‌ره‌، به‌ڵام خودی بونی ئه‌و رێگه‌ خێره‌ فه‌زیله‌ت نییه‌ ، بۆ نمونه‌ كاتێك خوای گه‌وره‌ هانمان ده‌دات بۆ ده‌ست گرۆیی هه‌ژاران ، ئایا هه‌ژاری فه‌زیله‌ت و باشییه‌؟! ئه‌گه‌ر ئێمه‌ هه‌ژارمان نه‌بوو، ده‌بێ خه‌ڵك هه‌ژاركه‌ین و هه‌ژاری به‌دی بێنین تاوه‌كو ئه‌و چاكه‌خوازییه‌مان ده‌ست كه‌وێ؟! ئه‌گه‌ر بۆمان ره‌خسا هه‌ژاری نه‌هێڵین-كه‌ ئه‌سته‌مه‌- ئه‌و كات ده‌بێ بڵێین ئایه‌تی قورئانمان له‌كارخستوه‌ و كاری پێ ناكه‌ین؟! بێگومان نه‌خێر، به‌هه‌مان شێوه‌ ئایه‌تگه‌لی وه‌هاش هه‌ن له‌ قورئاندا بۆ چاره‌سه‌ری واقعی تایبه‌ت هاتوون و بۆ ئێمه‌ له‌ رووی ته‌شریعه‌وه‌ -نه‌ك په‌ند و مه‌قصه‌د و فه‌زڵی خوێندن و تیلاوه‌- سودێكی وه‌های لێ نابینین، نمونه‌ی ئه‌م ئایه‌تانه‌ش ئه‌و ئایه‌تانه‌یه‌ كه‌ تایبه‌تن به‌خودی پێغه‌مبه‌ری خواوه‌ و ناكرێ به‌سه‌ر كه‌سی تردا پیاده‌ بكرێن... ئه‌مه‌ ته‌عتیلی ئایه‌ت نییه‌ تێگه‌یشتنه‌ له‌ ناوه‌ڕۆك و په‌یامی ئایه‌ته‌كانی قورئان ...
ئێمه‌ هه‌نوكه‌ دووجۆر خه‌ڵك توشی سه‌رئێشه‌و گێچه‌ڵمان ده‌كه‌ن. هه‌ردوكیشیان له‌ بری قورئان زیاتر به‌ مێژوو مه‌حكوممان ده‌كه‌ن. هه‌ندێك مێژوی ئیسلام و ئیجتیهادی زانایانمان لێ ده‌كه‌ن به‌ خودی دین و هه‌ندێكیش هه‌ر به‌و مێژووه‌ و به‌و كه‌لتوره‌ ئیسلام تاوانبار ده‌كه‌ن، له‌ كاتێكدا ئیسلام وه‌ك ئاین و په‌یام پیرۆزه‌ نه‌ك خودی كه‌سه‌كان و وه‌حی پیرۆزه‌ نه‌ك مێژوی مسوڵمانان... ئه‌گه‌ر به‌ میژوو مامه‌ڵه‌ له‌گه‌ڵ ئێستای گه‌لاندا بكه‌ین كه‌س به‌ ئه‌ندازه‌ی ئه‌وروپییه‌كان دڕنده‌ و خوێن رێژ نه‌بوون، ئه‌گه‌ر ئه‌ڵێن ئه‌وان په‌ندیان وه‌رگرتوه‌! ئه‌ی بۆ رێگه‌ ناده‌ن ئێمه‌ش په‌ند وه‌رگرین و ده‌یانه‌وێ ئه‌زمونی ناشیرینی مێژوییه‌ك بكه‌نه‌ كاڵای باڵای ئیسلام و ئاینی خوا؟! به‌ زۆر ده‌ڵێن هه‌ر ئه‌مه‌ ئیسلامه‌ و ئه‌وی دی ماسكه‌ و راسته‌قینه‌ نییه‌!!

به‌روار: 02/11/2014

بینین: 1638