Bzavpress ||

نوسه‌ران

دزه‌ كردنی عه‌لمانیه‌تی كوردی بۆ نێو ماڵی ئیسلام

عبدالرحمن محمدعارف‎ ‎

-- (( به‌شی سێیه‌م )) --
... ده‌بوو له‌ خاڵی یه‌كه‌مدا ئه‌وه‌ش بڵێم ئه‌گه‌ر ره‌هه‌نده‌ خوداییه‌كه‌ له‌ ئیسلام كرایه‌وه‌و كرایه‌ موڵك و مه‌ڵبه‌ندی مرۆڤگه‌لێك ئه‌وه‌ زۆر به‌ ئاسانی و بێ چه‌ندوچوون كه‌رت و كلۆر ده‌كرێت و هه‌ر رۆژه‌ی پارچه‌یه‌كی لێفرێ ده‌درێت هه‌تا ده‌گه‌ینه‌ حاڵه‌تێك شتێك نامێنیت ناوو وێنه‌و وتاری ئیسلام بێت، عه‌لمانیه‌كانیش شیوه‌ن بۆ ئه‌و سات و ساڵه‌ ده‌كه‌ن مرۆڤی موسڵمان تێیدا بگاته‌ خوارترینی پله‌ی گێلێتی و به‌و ئه‌نجامه‌ رازی بێت كه‌ ئیسلامی خودایی ببێته‌ گه‌مه‌خانه‌ و لاقرتی ده‌ست و ده‌می نه‌یارانی خوداو خوداپه‌رستان !.
بۆ خاڵی دووه‌میش ئه‌وه‌م مابوو بڵێم: ئه‌گه‌ر ئیسلام له‌ زه‌مان و مه‌كانێكی مێژوودا نیشته‌جێكرا كه‌ عه‌لمانیه‌ت ئه‌وه‌ ئامانجێتی و بێزوو ده‌كات به‌و رۆژه‌وه‌، دوای ئه‌وه‌ هیچ پاساوێك نامێنێت بۆ گواستنه‌وه‌ی بۆ ئه‌مرۆ و بۆناو كۆمه‌ڵگه‌ی كورده‌واری و هه‌ر كۆمه‌ڵگه‌یه‌كیتر، بۆ خاڵی سێیه‌میش ده‌كرا ئه‌وه‌ش بنوسم كه‌ ئه‌گه‌ر ئیسلام پاشگری ئێرانی یان سعودی یان ئه‌مریكی یان ئیسرائیلی یان كوردستانی یان روسیی یان توركی یان ..یان .. خرایه‌ پاڵی ئه‌وه‌ ده‌بێته‌ بیانوێیه‌كی باش بۆ بچوككردنه‌وه‌ی ئیسلامی په‌روه‌رگار هه‌تا ده‌گاته‌ ئیسلامی هۆز و ئیسلامی عه‌شیره‌ت و ئیسلامی كوچه‌و كۆڵانیش!، به‌م حاڵه‌وه‌ش كه‌ لوتكه‌ی پشێویی و ئه‌وسه‌ری پاشاگه‌ردانی ئایینی دێته‌دی و سنوری خودایی و ده‌ستوری ئیلاهیی و ده‌سه‌ڵاتی په‌روه‌ردگار ده‌كه‌وێته‌ نێو ئاره‌زووه‌كانه‌وه‌ و كاری خودایی و كاری مرۆیی یه‌كسان ده‌بن، بگره‌ كاری مرۆڤ و ده‌سه‌ڵاتی مرۆڤ ده‌خرێته‌ پێش ده‌سه‌ڵات و ده‌ستوری خودای مه‌زن و میهره‌بان.
4- خه‌باتی ئه‌وانی عه‌لمانی و نوخبه‌ (رۆشنبیره‌كه‌ی) له‌م رێگه‌شه‌وه‌ دزه‌یان كردووه‌ و پاش هه‌وڵ و هه‌ڵڵایه‌كی زۆر گه‌ره‌كیان بووه‌ هه‌تا ئه‌م چركه‌ش كه‌ ئیسلام ده‌رگای بانك و بازاڕو بۆرسه‌ی لێدابخرێت و قسه‌ی تێدا نه‌كات، به‌وه‌شه‌وه‌ ئۆخه‌یان نه‌كردووه‌و هه‌موو بریارێكی ئیسلامیان پێقوت نادرێت سه‌باره‌ت به‌ كێشه‌ی نه‌ته‌وه‌و نه‌ته‌وایه‌تی و نیشتمان و نیشتمان په‌روه‌ری و هه‌موو ئیسلامخوازێكیان پێ دژه‌ نه‌ته‌وه‌و نیشتمانه‌!، گشتیشمان چاومان هه‌یه‌و گوێمان ده‌بیسێت كه‌ هه‌ناسه‌یه‌كیان نه‌هێشتووه‌ته‌وه‌ بۆ ئیسلام هه‌تا به‌یان و به‌رنامه‌ی دابه‌زێت له‌ دونیای مافه‌كانی مرۆڤ و مافی ژنان و كچان و دایكان و هتد. ئه‌گه‌ر ته‌واوی ئه‌و ده‌رگایانه‌ داخران به‌ سه‌ر ئیسلامدا له‌ كوێدا ئیسلام به‌ ئیسلام ده‌مێنێت و كه‌ی و چۆن ئه‌وانیش چاوه‌رووانی ئه‌وه‌ ده‌كه‌ن به‌ موسڵمانی راسته‌قینه‌و و دۆستی خودا له‌ قه‌ڵه‌م بدرێن؟!، له‌ هه‌موو ناقۆڵاو ناشیرنتر بۆ ئه‌وانی عه‌لمانی ئه‌و خۆگیزكردن و خۆزلكردنه‌یه‌ له‌ رووی ئیسلام و موسڵماندا كه‌ یه‌كه‌م : هێشتا خۆیان به‌ دڵسۆزی ئیسلام ده‌ناسێنن و درۆیه‌كی حه‌یابه‌ره‌ ده‌دورن و ده‌ڵێن بۆ ئه‌وه‌ی ئیسلام ناشیرین نه‌بێت به‌ كاری سیاسی و ده‌وڵه‌تداری و ئیداره‌ی كۆمه‌ڵگه‌ پێویسته‌ به‌ دووری بگرین له‌و واقیعه‌ پیسانه‌!!. دووه‌م : به‌ هیچ شێوه‌یه‌ك قایل نابن پێیان بووترێت كه‌ ئێوه‌ پاش ئه‌وه‌ی ئیسلامتان ئاوا سوك و بچوك و بێ ناوه‌رۆك كردووه‌ كه‌واته‌ له‌ ده‌ره‌وه‌ی ئیسلامه‌وه‌ ده‌بینرێنه‌وه‌!، به‌ڵكو ده‌شیكه‌نه‌ به‌هانه‌ بۆ تۆمه‌تی ته‌كفیرو تیرۆرو زۆر بوختانیتر ..... ماوێتی

به‌روار: 18/04/2015

بینین: 1444