لە دیکتاتۆریەتی سیاسیەوە بۆ دیکتاتۆریەتی پسپۆڕیی

ئەرێ کێ لەبیریەتی لەکەیەکەوە ئاشتی هەورامی وەزیری نەوتە، لەوەتەی وەزارەتی سامانە سروشتییەکان دامەزراوە و نەوت بۆتە پرسێکی گرنگ بۆ هەرێم، ئاشتی هەورامی ئەو پۆستەی وەرگرتووە، واتە لە ٢٠٠٦ ەوە. من گومانم لە شارەزایی و پسپۆڕی ئەو بەڕێزە نیە، بەڵام بەڕیوەبردنی وەزارەتێکی وا گرنگ و بەرپرسیارێتی مەلەفێکی وا چارەنوسساز، ناکرێ تەنیا بە خەڵکی پسپۆڕ بسپێردرێت، بەبێ بوونی کاری بەیەکەوەیی لە وەرگرتنی بریارەکاندا، بەبێ بوونی روئیایەکی سیاسی و ئایندەیی.
من چەند ساڵێک بەر لە ئێستا وەزارەتی سامانە سروشتیەکانم بە وەزارەتی ناو جانتا ناوزەد کرد، مەبەستی من ئەوە بوو کە ناکرێ کاروباری وەزارەتێک لە تاکە کەسێک کۆبکرێتەوە. وەزارەت دەبێ کارلێکی لەگەڵ هاوڵاتیان و دامودەزگاکانی تر هەبێ، لە هەر سیستمێکی دیموکراتیدا، دەبێ دامودەزگاکان لەژێر چاودێری هاوڵاتیان، مێدیا، کۆمەڵگای مەدەنی و بەفەرمیش لەژێر چاودێری پەرلەمان دا بێ. بەڵام وەزارەتی سامانە سروشتیەکاننەک لە کارلێکێکی رۆژانە دانیە لەگەڵ دامودەزگاکانی تری وڵات و هاوڵاتیان، بەڵکو ئەو وەزارەتە وەکو دامەزراوە بۆ هاوڵاتیان وەزارەتێکی زاهیری یان گریمانەییە، ڤیرچوالە. وەزارەتێک کە هێشتا لەناو جانتایەکەو گریمانەییە و جانتاکەش بەزۆری لەدەرەوەی وڵاتە. دەتوانین بڵێین وەزارەتی ناوبراو ئوفیسێکی چەند ژووریان هەیە لە تەنیش یان لە ئەنجومەنی وەزیران، کە کارلێکی لەگەل هاولاتیان نیە، واتە هاوڵاتیان نازانن چی دەگوزەرێ لەوێ، لێرەوە گرفتی دیموکراتی و دامەزراوەیی دروست دەبێ. من باس لەوە ناکەم کە پرسی نەوت خەیاڵەو بوونی نیە، هەست بەوە دەکەی کە نەوت دەفرۆشرێ و لەوانەیە بەشێکی ناڕاستەوخۆ یان راستەوخۆ بۆ هاوڵاتیانی هەرێم بگەڕێتەوە، بەڵکو من باش لەپرسی دامەزراوەیی و پرسی دیموکراتی دەکەم لە دامودەزگاکانمان.
لەوانەیە ئاسایی بێ کە سوود لە کەسێکی پسپۆڕ وەربگیردرێت بۆ ماوەیەکی دوورودرێژ، بەڵام لەرووی دیموکراتیەوە ئاسایی نیە ئەو کەسە بکرێ بە کەسێک کە جێگرەوەی نەبێ، ئێستا تێگەیشتنێک دروستبووە کە کورد بەبێ ئاشتی هەورامی ناتوانێ پرسی نەوت بەڕێوەببات، خۆشی وتبووی کە ئەگەر ئەو نەگەڕابوایەوە، کورد نەیدەزانی نەوتی خاو چیە. باشە دوای ئاشتی هەورامی دەبێ کورد چی بکات، دەبێ هەمووان دوعای سەلامەتی بۆ بکەین.
دیارە ئاشتی هەورامی تەنیا نیە لە مانەوەی لە پۆستێکدا بۆ ماوەیەکی دوورودرێژ، لە پۆستە حیزبی و حکومییەکان مانەوەی کەسەکان بۆ ماوەیک زۆر یان بۆ هەتاهەتایی بۆتە دیاردە. ئەو کەسانە بەزۆری لەسەر بنەما و هاوکێشەی سیاسی یان حیزبی لەو پۆستانە دەمێننەوە، بەڵام ئاشتی هەورامی نە لەسەربنەمای سیاسییە و نەحیزبی، بەڵکو لەسەر بنەمای شارەزاییەکەیەتی، بەڵام لەهەمانکاتیشدا بەمەرجی رازیکردنی سیاسیی و حیزبییەکان. لێرەوە دەبێ جیاکارییەک بکەین، من لەگەڵ ئەوە دام کە رۆڵ بدرێ بە شارازایی و پسپۆڕی، بەڵام نەک تەنیا بۆ رازیکردنی سیاسییەکان، پسپۆڕی نابێ تەنیا لەخزمەتی دەسەڵاتدار و سیاسەتمەداران بێ، بەڵکو دەبێ لە خزمەتی هاوڵاتیان و پرۆسەکە بێ. ئەوەی ئێمە دەیبینین گۆڕانکارییەکە لە دیکتاتۆریەتی سیاسی و حیزبییەوە بۆ دیکتاتۆریەتی پسپۆڕی، بەڵام هێشتا لە خزمەتی دیکتاتۆریەتی سیاسیەوەیە. لێرەوە دیوی تاریکی زانست و پسپۆڕییمان بۆ دەردەکەوێت.