لە کۆنگرەیەی رۆژنامەوانی لەنێوان پارتی دیموکراتی کوردستان و بزوتنەوەی گۆڕان، کۆتایی ھات و گۆڕان رایگەیاند کە دەچنە نێو حکومەتەوە.

لەپێناو ھێنانەدی بەرژوەندییە باڵا‌کانی گەلەکەمان و لە ڕوانگەی ھەستکردن بە بەرپرسیاریەتیی نەتەوەیی و نیشتمانی بۆ تێپەڕاندنی دۆخی ئێستای ھەرێمی کوردستان و ھێنانەکایەی قۆناغێکی نوێی حوکمڕانی کە ئامانجی یەکەم و سەرەکی؛ خزمەتی ھاووڵاتیان بێت بەبێ جیاوازی، لەسەر ئەم خاڵانەی خوارەوە ڕێککەوتین: 
 یەکەم: پێکھێنانی حکوومەتی بنکەفراوان و یەکگرتوو کە ڕەنگدانەوەی ئیرادەی دەنگدەران و تەواوی خەڵکی کوردستان و ڕێزگرتن لە دەرەنجامەکانی ھەڵبژاردن بێت. 
 دووەم: پێکھێنانی لیژنەیەکی ھاوبەش لە سەرجەم لایەنە بەشدارەکانی کابینەی ھەشتەمی حکوومەتی ھەرێمی کوردستان بۆ داڕشتنی بەرنامەیەکی ھاوبەشی حکوومەت لەسەر بنەمای چاکسازی و چەسپاندنی دامەزراوەیی لە ھەرێمی کوردستان. 
 سێیەم: کاراکردنی ڕۆڵی پەرلەمانی کوردستان بە جۆرێک کە بتوانێت بە شێوەیەکی سەربەخۆ ئەرکەکانی لە یاسادانان و چاودێریکردن و بەدواداچوونی کارەکانی حکوومەتدا ئەنجام بدات. 
 چوارەم: چەسپاندنی پرەنسیپی (شەراکەت) لە دەسەڵاتی سیاسیی ھەرێمی کوردستاندا کە سەرجەم ھێزە بەشداربووەکانی حکوومەت، ھاوبەشی ڕاستەقینە بن لە دەسەڵات و دروستکردن و جێبەجێکردنی بڕیاردا. لەم ڕوانگەیەوە بزووتنەوەی گۆڕان ھاوبەش دەبێت لە: 
 ا-       پۆستی سەرۆکی پەرلەمانی کوردستان بۆ ھاوبەشی لە دەسەڵاتە سیادییەکاندا. 
 ب- ھاوبەش دەبێت لە کابینەی ھەشتەمی حکوومەتی ھەرێمی کورددستاندا بە وەرگرتنی پۆستەکانی: 
 ١- وەزیری پێشمەر‌گە. 
 ٢- وەزیری دارایی و ئابووری. 
 ٣- وەزیری پیشەسازی و بازرگانی. 
 ٤- وەزیری ئەوقاف و کاروباری ئایینی. 
 ٥- سەرۆکی دەستەی وەبەرھێنان. 
 ٦- ھاوبەشی لە دامودەزگاکانی دیکەی ھەرێمی کوردستاندا کە دواتر دیاری دەکرێن. 
 پێنجەم: ھەردوولا پشتگیریی تەواوی سەرخستنی بەرنامەی ھاوبەشی حکوومەتی ھەرێمی کوردستان دەکەن بە شێوەیەک کە زامنی پاراستنی ئازادیی ڕادەربڕین و ئینتیمای سیاسی و چوون بەرەو ھەڵبژاردنێکی شەفاف و دوور لە ھەر فشار و سزایەکی سیاسی بێت. لەم ڕوانگەیەوە ھەفتەی داھاتوو کۆبوونەوەی پەرلەمانی کوردستان ئەنجام بدرێت بۆ ھەڵبژاردنی سەرۆکایەتیی پەرلەمان.