رۆژی ٢٢ی ئازاری ئەمساڵ(٢٠١٤) ئەحمەد مەحەمەدی کوشت. 
بە جیا لەوەی ئەحمەد و مەحەمەد سەر بە چ نەتەوەو تیرەو تایەفەو ئاینێکن، وە بە دەر لەوەی چ هۆکارێک لە پشتی کوشتنەکەوە هەیە: ئایا بێمەبەست و بێویست بوە، یا لە ئاکامی دەمەقاڵەو ئینفعالێکی لە ناکاو بوە، کێ تاوانباری سەرەکیە لە کێشەکەو کێش دەیەوێت بۆ بەرژەوەندی خۆی روی مەسەلەکە وەرچەرخێنێت، بەدەر لەمانە مەسەلەکە بە سادەیی ئەوەیە چەکدارێک بێ چەکێکی کوشت.
ئەحمەد کەسێکی چەک بەدەستە، کۆمەڵێک چەک بەدەستیش لەدەورین و لە ژێر دەسەڵاتیدان، مەحەمەدیش هاوڵاتیەکی مەدەنی بێ چەکە، بێزارە لەو کارسەختیەی روی لە بەغدا کردوە کە مرۆڤ ناچار دەکات بۆ کارێکی نیو سەعاتی رۆژێکی تەواو تەرخان بکات.
لە عێراقدا( تا ئاستێکی زۆریش لە کوردستانیشدا) مرۆڤە چەک بەدەستەکان لە چینێکی باڵان، خاوەن هەیمەنەو سامن، سامێکی رەش کە مردنی لێدەچۆڕێت. ئەوان مەناعەو حەسانەیەکی سەیریان بە خۆیان داوە، چونکە لە سەروی هەمو دیسپلین و یاسایەکن. لە عێراقدا دوو چین هەیە: چینی چەک بەدەست و چینی بێچەک. چینی یەکەم بەهرەمەندە لە بەنرخترین شت کە سەندنی روحی مرۆڤەکانە، چینی دووەمیش بەهرەمەندە لە بێنرخترین شت کە روحیەتی. ئەمە هاوکێشەی عێراقی نوێیە. ئەم پرۆسەیە دەیەها ساڵە لە عێراقدا پیادەدەکرێت، هەر لەیەکەم ئینقلابی شومەوە کە پێی دەوترێت شۆڕش کە جگە لە شەرعیەتدان بە دەسەلاتدارێتی کۆمەڵێک ئەفسەری خوێنرێژ هیچی تر نەبو، تا سەردەمی حەرەسی قەومی و نازم گزار و سەدام حوسێن و عەلی حەسەن مەجید. لە دوای روخانی رژێم و هاتنی هێزی ئەمریکا بۆ عێراق و هەڵسوکەوتە بەربەریەکانیان لە ئاست هاولاتیانی سڤیلدا، ئیتر ئەو جۆرە لە مامەڵە نا ئینسانیانە بو بە بەشێک لە کارنامەی ئاسایی و رۆتینی سوپای عێراق و پۆلیس و میلیشیا حکومی و حیزبیەکان، بە لایەنگر و نەیارەوە.
لەم وڵاتەدا بە هەرێمیشەوە، دەزگا چەکدارەکان و ئەمنیەکان ئازادانە خشونەت بە کار دێنن، دژ بە هەر هاوڵاتیەکی ئاسایی، لە رۆژنامەنوس و چالاکوانی مەدەنی و تەنانەت پەرلەمانتاریش دەدرێت. ئەو زبریە لە مامەڵە کردن لەگەڵ مافە ئاساییەکانی ئینساندا، هەم پاشخانێکی دورو درێژی لە کەلتوری نرخ دانەنان بۆ مرۆڤ هەیەو هەمیش بەدەرە لەهەر جۆرە لێپێچینەوەیەک، چونکە هەمیشە چەک بەدەستەکان لەسەر حەقن و ئەوانن کە ئەمنی نەتەوەییمان دەپارێزن.
بەدەر لەوەش، ئەم جۆرە روداوانە، داگیرساندنی دەنکە شقارتەیەکە بەسەر بەحرێک لە رق و کینەی سیاسی و ئیتنی پەنگخواردودا. دەرفەتێکە بۆ یەکلا کردنەوەی حیساباتی کۆن، بۆ برەودان بە قسەی ناو ناخی مرۆڤەکان. 
ئەوەی مالکی فەرموی لاشعوری راستەقینەو نییەتی پەنهانی ئەهلی عێراقە بە رامبەر بە کورد. ئەوان بە سادەیی ئامادەن هەڵەی گەنجێکمان بقۆزنەووە بۆ رژاندنی رقێکی ئەستوری نەتەوەیی. لای مالکی مەسەلە ئەوە نیە هاولاتیەک هاولاتیەکی کوشت، چەکدارێک بێ چەکێکی کوشت، سەربازێک مەدەنیەکی کوشت، بەڵکو لای ئەو مەسەلەکە ئەوەیە کە کوردێک عەرەبێکی کوشت، پێشمەرگەیەک کە نابێت لە سنوری هەرێم تێپەڕێنێت هاتوە لە بەغدای عروبە هاولاتیەکی عەرەب ئەکوژێت. 
جاران بەعسی و قەومچیە عەرەبەکان دەیانوت کورد هۆکاری لاوازی بەرەی عەرەبە دژ بە زایۆنیزم، کورد خەنجەر لە قەبرغەی سەربازی عەرەب دەدات. قەومچیە نوێکان و سەنترالیستەکانی ئێستا قەوانی ئەوە لێئەدەن کە ئەوە کوردە عێراق دادەدۆشێت و لەروی ئابوریەوە لاوازی دەکات. 
سەردەمەکان گۆڕان، دەموچاوەکان گۆڕان، بەڵام شتێکی نەگۆڕ هێشتا لە عێراقدا بە راوەستاوی ماوە ئەویش باوەڕ نەبونی نوخبەی عێراقیە بە مافە ئینسانیەکانی کورد. دەقە دەستوریەکان زۆر گۆڕان، بەلام ئەوەی کە قەت ناگۆڕێت ئەو تێڕوانینە ئیستعلائیەیە کە هەمیشە پێی وایە ئێمەی کورد میوانێکی رەزا قورسی بارگرانین بەسەر عێراقدا و هاولاتیبونیشمان تەنها مەکرومەیەکە نەوەک ماف.