تەلەڤیزیۆنی لیبیا گرتەیەكی ڤیدیۆیی ساعدی قەزافی كوڕی موعەمەر قەزافی سەرۆكی كۆچكردووی لیبیای خستەڕوو، لە گرتە ڤیدیۆییەكەدا ساعدی قەزافی لە بەندیخانەوە، لەبەرانبەر لەقكردنی سەقامگیریی و ئاسایشی وڵاتەكەی، داوای لێبوردنی لە گەلی لیبیا كرد. 

ساعدی قەزافی تەمەن (40 ساڵ) وتی: لەبەرانبەر لەقكردنی ئاسایش و سەقامگیری و هەموو ئەو ئازارانەی بە وڵاتم گەیاند، داوای لێبوردن لە هەموو برایانم دەكەم لە حكومەتی لیبیا. 

كوڕەكەی موعەمەر قەزافی دانی بەوەشدانا كە هەموو هەڵسوكەوتەكانی پێشووی هەڵەبوون و لەبری یارمەتیدانی وڵاتەكەی، زیانی بە گەلی لیبیا گەیاندووە. 

وتیشی: لە بەندیخانەدا بە باشی مامەڵەم لەگەڵ دەكرێت، داوایشی لە  هەموو چەكدارەكان كرد چەكەكانیان رادەست بە حكومەت بكەن. 
لەسەر داوای حكومەتی لیبیا، لە سەرەتای ئەم مانگەدا (نەیجەر)، ساعدی قەزافی رادەستی لیبیا كرد.