ئسيرايل دەڵێ هێرشە سەربازييەكە لە وەڵامي ئەو هێرشە بووە كە سێشەممە كراوەتە سەر سەربازانمان لە جۆلان و قوربانيمان داوە.

سوپای ئیسرایل سەرلەبەیانیی ئەمڕۆ چوارشەممە ڕایگەیاند، كە هێرشیان كردووەتە سەر هەندێك مۆڵگەی سەربازیی سوپای سووریا، ئەمەیش وەك تۆڵەكردنەوەیەك لەبەرانبەر ئەو بۆمبە چێنراوە بووە لەسەر ڕێی سەربازانی كە بە هۆیەوە چوار سەرباز بوونە قوربانی.

سوپای ئیسرایل زیاتر وتی، ئەو شوێنانەی كە لە لایەن ئیسرایلەوە كراونەتە ئامانج، مۆڵگەیەكی سەربازیی سووریا و دامەزراوەیەكی مەشق و هاوكات تۆپخانەیەك بوون.

گوتەبێژی سوپای ئیسرایل، كۆلۆنێل پیتەر لیرنز ووتى، فڕۆكە جەنگییەكانی ئیسرایل شەو هێرشەكەیان ئەنجام داوە و ئەو شوێنانەیان كردوونەتە ئامانج كە پێگە و مۆڵگەی سەربازیی سوپای سووریا بوون لەو بەشەی جۆلان كە لەژێر دەستی سوورایدایە.