بە چاكمزانی لەم دۆخەی ئێستاماندا چاوڕۆشنی بدەینە زۆر لە گەنجەكانمان سەبارەت بە مێژی دروست بوونی (پەكەكە) و ئەو ڕەحمەتەی بانگەشەی بۆ دەكەن؟!
لەسەرەتاكانی هەشتاكان زیاتر لە ١٢لایەنی ماركسی لە (كوردستانی توركیا) دروست بوو ، لەوانە(كاوە ، دەنگی كاوە ، ئاڵای ڕزگاری ، ئازادی ، دەدەقادە ، حزبی سۆشیالیستی كودستان ، پ ك ك).

دروست بوونی(پەكەكە):
بەپێ‌ی تەقویمی خۆیان لە ٢٧_١١_١٩٧٨لە ناوچەی (ئامەد)دروست بووە ، یەكەم كۆنفڕانسی لە ١٥_تەموزی_١٩٨١كراوە ، یەكەم چالاكی پێشمەرگایەتیش لە ساڵی ١٩٨٤دەستی پێ‌كرد لە ناوچەی شەمزینان.
ئەو حزبە مێژووی زۆر بەندە بە سەرۆكەكەی(عبدالله ئوجەلان_ئاپۆ)ئاپۆ واتە مامە ، كە لە ساڵی ١٩٧٠چالاكی خوێندكارانەی هەبووە و دەستگیركراوە ، لەگەڵ چەند كەسایەتی یەكی تری وەك:(جەمیل بابەق_جمعە، علی حەیدەر قەیتان ، عوسمان ئۆجەلان....)،كە بڵاوكراوەیەكەی ناوەندی بەناوی(سەربەخۆبوون)دەردەكرد.

بیروباوەڕ و ئایدۆلۆژیای (پەكەكە):
هەست و سۆزی نەتەوایەتی ئەو دەروونە هەڵچووانەی بۆ دروستكرد كە جۆرە عقیدەیەكی(ماركسی لینینی)ی توندی شێوە ڤێتنامیانە و چاولێكەری بۆ(هۆشی مین)ی سەرۆكی (ڤێتنام) و حزبی شوعی لە ١٩٧٥ لەكاتی ڕزگاربوونی (ڤێتنام) وەربگرێت و بیكاتەی بناغەی كاری سیاسییان.

ڕەوت و مێژووی (پەكەكە):
پەیوەندی یەكی موكومی لەگەڵ(بەرەی میللی ڕزگاری خوازی فەڵەستین_جۆر حەبەش)هەبوو ، بۆیە گەریلاكانی لە لبنان ڕادەهێنا  و (ئاپۆ) خۆی لە بیقاع بوو.
ووشەی(گەریلا)زاراوەیەكی ئیسپانی یە بە مانای وردەشەڕ ، (واتە لە شێوەی پارتیزانی) ، جا سەرنج بدە (پەكەكە)ویستی زۆربەی چەم و زاراوە كوردایەتییەكانی وەك پێشمەرگە و وەرگێڕێ‌ بۆ گەریلا بۆ ئەوەی ماركسیەتێكی خەست پەیڕەو بكات ، ئەو داب و نەریت و زاراوەی كوردیش ڕاپێچ بدات.
+ لە ساڵی ١٩٨٣توركیا و عێراق ڕێكەوتن هەریەكە بۆی هەبێت ٢٠كم بچێتە ناو خاكی یەكتر بۆ لێدانی پێشمەرگە ، لە هەمان ساڵ توركیا بۆ یەكەم جار هاتە عێراق.

+ دروست كردنی گەریلا و چالاكیەكانی لە ناو كوردستانی توركیا لە دوای ١٩٨٤بووە هۆی زاڵ بوونی (پەكەكە)بەسەر لایەنەكانی تری ماركسی كورد لە سەرووی كوردستانەوە.

+ یەكەم چالاكی (گەریلا)ی (پەكەكە) لە ١٥- ٨ – ١٩٨٤لە شەمزینان دژی توركیا ئەنجام درا.

+ دوای ڕاپەڕینی ١٩٩١ ئاسۆیەكی فراوانتری بۆ (پەكەكە)كردەوە و لە سەرەتادا زۆر لایەنە چەپیەكانی كوردستانی عێراقیش(ئاپۆ)ی بە ڕابەر و مونەزیری خۆی دەزانی، ئەگەرئەو شكستەی بەسەر شیوعیەتی جیهانی نەهاتبایە ڕەنگە زۆربەی حزبە چەپیەكانی كوردستانی عێراقیش و بەشی زۆری یەكێتیش دەبوونە باڵێكی(پەكەكە) لە كوردستانی عێراق.

+ پڕۆژەیەكی سیاسی و ئابوری باشی داڕشت ، ئەوە بووە هۆی فراوان و دروست بوونی ئەو حزبە و ئیزگەی(سەربەخۆی)كوردستانی دامەزراند.
+ لە ساڵی١٩٩٣(یەكێتی و پارتی)بە هاوكاری سوپای توركیا هێرشیان كردە سەر(پەكەكە) و ئەوەش بوو بە یەكەم چالاكی و شەڕی حكومەتی هەرێم.

+دوای وەستانی ئەو شەڕە هەردوو حزب زنجیرەیەك سەنگەری سنوریان وەرگرت لە سەر بودجەی توركیا.

+ لە ١٦- ٤-١٩٩٤سكرتێری یەكێتی توانی یەكەم كەناڵی گفتوگۆی ناڕاستەوخۆ بكاتەوە لە نێوان(ئاپۆ) و (تورگوت ئوزال)، بە یەك لایەنی بۆ یەكەم جار(پەكەكە) شەڕی ڕاگرت،بەڵام بە مردنی كت و پڕی(تورگوت ئوزال) ئەو پرۆژە ئاواتەش مرد.

+ ئەو جارە توركیا توندتر كەوتەوە شەڕ و سێ‌ هەزار دێ‌ی وێران كرد ، و زیندانەكانی پڕكرد.

+ بەهۆی سود وەرگرتن لە یاسا دەولیەكان و ئەوروپا(پەكەكە)توانی بەناوی دەزگای كەلەپور نەك (پەكەكە) یەكەم كەناڵی ئاسمانی  MED TVبكاتەوە.

+ بەیەك لایەنی تا ئێستا(٤)جار شەڕی ڕاگرتووە و توركیا گوێ‌ی پێ‌نەداوە و بە ئاشكرا دەڵێ‌ ئێمە سوپایەكی ئازامان هەیە و تەنها بەهێز وەڵام دەیەینەوە.

+ لە ٢٥-٨-١٩٩٥ لە ناكاو هاتە ناو شەڕی ناوخۆی كوردستانی عێراق لە دژی پارتی ، ئیدی تا سەدەی نوێ‌ هەر ناكۆك بوون ، لە كاتێكدا بە پێ‌ی ڕای(پارتی) حزبی(پەكەكە)فەرمانی تێكدانی ئەزموونی كوردستانە ، وە ڕای (پەكەكە)ش وایەكە(پارتی) لە ساڵی ١٩٩٢ دا لە ناو خاكی توركیا شان بەشانی سوپای توركیا شەڕی گەریلا دەكات.
+ لە ساڵی ١٩٩٩بە پیلان و سیناریۆیەكی لێڵ و ئاڵۆز (شمدین سكاك) لە نزیك (دهۆك) لەلایەن فڕۆكەكانی توركیا دەستگیركرا ، (شمدین سكاك)سەركردەیەكی نزیك (عبدالله ئۆجەلان)بوو ، خۆی تەسلیمی (پەكەكە) كردبۆوە ، لەكاتی گواستنەوەی لە (دهۆك) بۆ (هەولێر) بە هاوڕێ یەتی دەزگای(پاراستن) كەوتە ئەو بۆسەو گیرا ، لە كاتێكدا گومان بۆ ئەوە دەچێت كە سیناریۆیەك بێت لە نێوان(پارتی) و (توركیا) بەڵام ڕاگەیاندنی (پارتی) دەلێ‌: هەلیگۆپتەری (توركیا)بێ‌ پرسی ئێمە ئەو پڕۆسەی ئەنجام داوە.
بەهۆیوە(توركیا)زانیاریەكی باشی دەسكەوت لەبارەی(ئاپۆ) ، كاتێك وەفدی (توركیا) لای (حافز ئەسەد)ی سەرۆكی(سوریا) بوون باسی شوێنی(ئاپۆ)یان كرد و ئەسەدیش ئینكاری كرد یەكسەر وەفدی(توركیا)مۆبایلیان كرد بۆ ژمارەی (ئاپۆ) و وەری گرت..
ئەوەش هەروا پێدەچوو لە (شمدین سكاك)وەرگیرابێت ، لە كۆتایدا دەستگیركرا بەو هەنگاوانەی خوارەوە:
_ لەساڵی ١٩٩٨(توركیا) و (ئیسڕائیل)كەوتنە هاوپەیمانیەتێكی ترسناك و ئوردنیشیان ڕاكێشا و چواردەوری سوریا گیرا ، هەر چەندە ووتیان لە دژی میللەتی ناوچە و عەرەب نییە ، بەڵام هەر خێرا پێچەوانەی دەركەوت و (توركیا)هەڕەشەی و فشارێكی توندی خستە سەر (سوریا) هەتا (ئاپۆ) دەرپەڕێنێت و سوریاش ملكەچی بوو.
_ هەرسێ‌ مخابراتی(سیای ئەمریكی_میتی توركی_موسادی ئیسڕائیل) لەگەڵ هەندێك مخابەراتی عەرەبی تر بەدوای دەگەڕان لە هەموو ، لەساڵی ١٩٩٩(ئاپۆ)چووە (ڕوسیا) ، لەوێش بۆ ئیتالیا و دەستگیركرا ، هەمان كات وەزیری دادی حكومەتی هەرێم(قادر جەباری)بەخۆیی و كۆمەڵێك بەڵگەنامەوە بەرەو ئیتاڵیا ڕۆشت هەتا بچێت سكاڵا لەسەر (ئاپۆ)تۆماربكات.

_١٥-٢-١٩٩٩دەستگیركرا و بەنایاسایی(قرچە + إرهاب + خرق السیادە الدولە اڵاخری...هتد)لەوێ‌ بە سڕكراوی برا بۆ ئیسڕائیل و لەوێوەش بۆ (توركیا) و هەتا ئیستاش لە بەندینخانە ماوەتەوە.

+ دوایی(پەكەكە)شەڕی وەستاند و هێزەكانی كشاندەوە لەناو خاكی(توركیا) ، جارێ‌ فەرمانی لە سێدارەدانی(ئاپۆ)هەڵپەسێردرا.

+ چەند ئینشیقاقێكیان كرد ، عوسمان ئۆجەلان لێیان جیا بۆیەوە و ناوی (پەكەكە)گۆڕا بۆ (كۆنگرەی نیشتمانی)بەڵام دواتر جارێكی تر گۆڕدرایەوە بۆ(پەكەكە).

+ لەوەتەی حكومەتی نیمچە ئیسلامی (گەشە و پەرەپێدان)دەسەڵاتی حكومەتی گرتۆتە دەست ، بواریان زیاتر پێ‌دراوە ، كەناڵی تەلەفزیۆنی كراوەتەوە و كێشەكەیان روو لە جیهانی بوونە ، هەرچەندە ڕۆژئاوا و ئەمریكا كۆنگرەی ئیسلامی كەمتر پاڵپشتی كودرستانی توركیا كردوە ، بەڵام كرانەوەی بێ‌هاوتا لە چاو ئەو سەدەیەی ڕابردووە بەڕێوەیە.

هەڵە و مەینەتیەكانیان بەتایبەتی بۆ میللەتی كوردی مسوڵمان كە ئەوان بەڕەحمەت بۆ هەرچوار پارچەی كوردستانی وەسف دەكەن!
١- وەك حزبە ماكسیە كوردی یەكان تر بە درەنگەوە(ماركسی لینینی)یان پەیڕەوكرد ، كە لە جیهانی بەرەو گەڕانەوە و سەرایی قەیرانی لێ‌دەركەوتبوو ، لە كاتێكدا لە كودرستانی سەروو و خواروو شەڕە پڕۆلیتاریابوو ، لە ئەوروپای ڕۆژهەڵات لە سەرەتایی ١٩٨٠وە سەندیكای كرێكاران دەستیان بە خۆپیشاندان كرد دژی سیستەمی شیوعیەت ، بەتایبەتی سەندیكای پۆلەندا بە ڕابەرایەتی لیخ فاونسا ، ئەوانە كرێكاربوون ، كەچی دروشمی ڕوخاندنی شیوعیەتیان هەڵگرتبوو ، مەزنترین كاریگەر بوو ، چونكە شیوعیەت خۆی بە نوێنەری كرێكاران دەزانی.
لە فەڕەنسا و پڕتغال و ئیتالیاش حزبە شیوعیەتەكان لە هەڵبژاردنەكان دەنگیان هاتە خوار ، لە ئەفغانستان و ئێران و ڕابوونی ئیسلامی دژی هەردوو جەمسەر سەری هەڵدا ، بۆیە ئەو ماركسیەتە نەبووە پاڵنەری كوردایەتی بەڵكو بووە بارگرانی ، پاساو و هۆكارێكە تا ئێستاش ئەو بوختانەی تیرۆر بە بزوتنەوەی ڕزگاریخوازی كوردستانی سەروو نوساوە(ئایا ئەمەیە ڕەحمەتی حزبەكەی ئاپۆ بۆ كورد؟!).
٢- دەبوایە وەك ستراتیجیەت ئێستا(پەكەكە)لە بەرەیەك بوایە دژی سەرچاوەكانی هێزی توركیا لە ئەمریكا و ئسیڕائیل و دەست پێوەندەكانی ، بەڵام بەو ماركسیەتەی ئێستای بێجگە لە كوردی بەدبەخت كەس خۆی بە میراتكری ئەو مەدرەسەیەش نازانێت(ئایا ئەمەیە ڕەحمەتی حزبەكەی ئاپۆ بۆ كورد؟!).
۳- زۆر ڕوونە هەم ڕۆژهەڵات (چەپی) و ڕۆژئاوا(لیبڕالی)بەرپرسن لە دروست بوونی مەینەتی كورد ، كەچی سەركردەكانی كورد هەرجارەی بەلای ڕۆژئاوا یان ڕۆژهەڵات لەویشەوە بناغەی سایكس_پیكۆیە بە زەحمەت ئەو دەرگا قوفڵ كراوانەی سەر كورد بەو كلیلانە دەكرێتەوە(كامەیە خێروبێر و پڕۆژە و چارەسەری ئاپۆ و حزبەكەی بۆ كوردستان و یەكگرتنەوەی چوار پارچەكەی؟!).
٤- لەسەر هەمان ئایدۆلۆژی بووە هۆی شەڕی زۆر خوێناوی لەگەڵ حزب و لایەنە سیاسیەكانی تری كوردستانی توركیا و كوردستانی تر ، هەتا لەگەڵ داب و نەریتی كوردیش ، ئینجا لەگەڵ زۆربەی عەشایەرەكانی كوردیش..كەزیاتر دەردی كورد ئاڵۆزدەكات(ئیتر كامە ڕەحمەتی ئەم ئایدۆلۆژیایە بۆ میللەتی كورد؟!).
٥- (ئاپۆ)لە دوورە وڵات بوو ، واقیعی كوردستان دەوروبەری بە سەلامەتی بۆ نقڵ نەدەكرا ، بۆیە لە قەبڵاندنی ڕووداوەكان بە هەڵەدا دەچوو ، هەر بە نموونە كە هێرشی كردە سەر(پەكەكە) لە ساڵی ١٩٩٥یەكسەر(ئاپۆ)داوای لە (یشار قایە)ی سەرۆكی(كۆنگرەی نیشتمان)كرد كە پەرلەمانەكەی لە ئەوروپا بگوازێتەوە(دهۆك) و فدراسیۆنێكی دیموكراسی لەوێ‌ دروست بكەن !  ئەو دهۆكەی نێوان دوژمنی توركیا و عێراق و بەهۆی هێڵی لاوازی(۳٦)ی یاسای دەولی ٦٨٨كەمێك پارێزراوە ئینجا لە دژی هەموو ئەوانە و لە دژی پارتی دەبێ‌ چۆن(یشار قایە) بۆی بكرێت پەرلەمان بگوازێتەوە(دهۆك)؟!
٦- خۆتێوەگلاندن لە كێشەكانی كودرستانی عێراق و دەست لە كاروبار وەردانی بێ‌مۆڵەتی حزبە دەسەڵاتدارەكان و لەدوایشدا هاتنە ناو شەڕی كورد بە كورد ،هیچ پاساوێكی بۆ نیە جگەلە چەوتی ستراتیژیەت و تێكەڵ كردنی(ئەوەلیات و سانەویات) و (واقع و ئاواتەكان).
٧- خۆی دژی ئیمپڕیالیزمە ، دژی بەری ڕەجعی و وابەستەی ئیمپریالیزمی ناوچەكەشە كەچی نەیتوانی هێزی ئیسلامیەكانی گەشەسەندوو لە جیهان و لە ناوچەكە و لە ناوخۆش بكاتە پاڵپشتێكی كێشە ڕەواكەی كوردی(توركیا)كە زۆر مەزڵومن كە چی بە زاڵم پیشانبدرێن ، واتە بەو ڕوانگەو و فەرهەنگەوە نەیتوانی دوژمنی دوژمنیش بكاتە دۆست كە ڕێسایەكی سەرەتایی لۆژیكی یە كەسی عەوامیش سود لەو ڕێسایە وەردەگرێ‌! (ئائەم سیاسەتە هەڵانەی دەری دەخات پەكەكە كەسانی نەشارەزا لە سیاسەت و واقیعی جیهان و ناوچەكە دەیبەن بەڕێوە كە ئامانجیان كورد و كوردستان نییە بەڵكو ئامانجی هەرە گەورەیان پەیوەستبوونێكی ئاسنینە بە لۆژیكە دۆڕاوە تواوەكەی ماركسەوە!).
٨- هەڵسوكەوتی لەگەڵ(خائینان)زۆر توند و (شۆڕشگێڕی)بوو ، ئیسلامی نەبوو بە پێ‌ی ئەو ئامۆژگارییە بەناوبانگەی ماركس خۆی دەڵێت:(ئێوە شوڕشگێربن نەك چاكساز) ، ئەوەش بووە هۆی زینجیرەیەكی نەبڕاوەی تۆڵە و تۆڵەسەندنەوە كە لە كۆتایدا بە قازانجی (توركیا)تەواو بوو ، جاشێكی زۆری بۆ پەیدا بوو.
٩- لە (كۆمەڵەی نەتەوەی) و دوایش لە دەزگا جیهانیەكان و بنەماكانی(مافی میللەتان)و لە زۆربەی بڕیارە جیهانیەكان سەبارەت بە دادگا وا هاتووە كە وەك یاسای دەولی هەر میللەتێك بەزمانی خۆی بچێتە بەردەم دادگا ، ئیتر دەرفەتێكی مێژوویی نایاب هاتبوو كە لە دادگاكردنی(ئاپۆ)دا بە زمانی كوردی بداوایە نەك بە توركی..ئیتر توركیا و دەستورەكەی خستە ئەو پەڕی تەك و لۆ ، كەچی ئەوەی نەكرد.
١٠- ئەو كۆت و زنجیرەی سەدەیەكە كە كورد بەندی كردووە وەك ڕوونە عەلمانیەتی توركیایە ، ئەوەش بە تەنها بە كورد هەڵناوەشیچتەوە ، لە دەنگ دانەكانی پەرلەمانی (توركیا)بەتەواوی(پەكەكە)لایەنگیری بەرەی عەلمانی دەكرد و دەنگی دایە یەلماز نەك ئیسلامییەكان كەواتە (هەڵتەكاندنی دەستوری عەلمانیەتەكەی + سەقافەتی ئەتاتورك + پشتیوانە جیهانیەكانی)هەمووی وەردەگەڕا ئەگەر حزبی ڕەفاه بە تەواوی لە هەڵبژاردنەكە دەرچوبوایە ، یان دەنگی بە مەرج و ڕێكەوتن بدابایە یاڵ دەنگی حزبی گەشە و پەرەپێدان..كەچی (پەكەكە) ئەو ستراتیجیەی نەپێكا ! ، وەك ستراتیجی عەلمانیەتی حزبە كوردستانیەكانی تری كوردستانی خوارووش ، دۆست و دوژمنیان لە ڕووی ستراتیژیەوە تا ئەم ساتەش پێ‌ دەستنیشان نەكراوە ، بۆیە ئەوەندە كێشەی كورد لە بازنەی داخراو دەخولێتەوە(بۆیە ئالێراشدا فرۆشتنی بەرژەوەندییە نەتەوەی یەكە بەرامبەر ئایدۆلۆژیایی ماركسی لینینی(پەكەكە) بەرچاو دەكەوێت؟! ئابەم حاڵەوە بانگەشەی ڕزگاربوون و سەربەخۆبوون و یەكگرتنی هەر چوارپارچەی كوردستان دەكەن؟!) ئەمەش بریتی بوو لەو نەهامەتیەی تووشی كورد و كوردستان بووە بە هۆی هیواكانی (ئاپۆ) و حزبەكەی.

سەرچاوە/(ناسنامەی حزبە كوردستانیەكان)(مسعود عبدالخالق)(لا ٢١٩ - ٢٢٧)بە دەستكارییەوە.