بەهۆی بەردەوامی شەڕ و پێکدادان لەنێوان پێشمەرگە و حەشدی شەعبیدا، لە ئێستادا بارودۆخی قەزای دوزخورماتوو نائارامە و هاتوچۆ کەمبووەتەوە.

بەپێی زانیارییەکانی بزاڤ، لە شەڕ و پێکدادانی نێوان پێشمەرگە و حەشدی شەعبیدا لە قەزاکە، کارمەندێکی ئاسایش شەهید بووە و پێشمەرگەیەکیش بریندارە.

لە ئیستادا، زیاتر لە ٢٠ هاولاتی‌ کورد، کە خاوەن کارگەن و کاسبن لە ناوچەیەکی دەرەوەی قەزاکەدا لەلایەن چەکدارانی‌ حەشدی‌ شەعبیەوە رفێندراون.

رووبەڕووبوونەوەکە، پێشنیوەڕۆی‌ ئەمڕۆ ڕوویداوە و بەهۆیەوە سێ چەکداری‌ حەشدی‌ شەعبی کوژراون و لە هێزەکانی‌ پێشمەرگەش بریندار هەیە.

تەواوی هێزەکانی پێشمەرگە لەو ناوچەیەدا لە باری ئامادەباشیدان و ناوبەناو، دەنگی تەقەی نیشانشکێنەکانی حەشدی شەعبی (قەناس) لە قەزاکەدا، دەبیسترێت.