شێركۆ جەودەت سەرۆكی لیژنەی سامانە سروشتییەكان لە بانگەوازێكدا نوسیویەتی: "لەم قۆناغەدا بە پێویستی دەزانین كە بانگەوازی هەریەكە لەو دوو بەڕێزە بكەین بۆ بەرنامە و دیبەتێك بە ئامادەبوونی كەناڵەكانی راگەیاندن بۆ ئەوەی بە راشكاوانە بەڵگه‌كانیان بخەنەڕوو كە داخۆ كێ بەرپرسە لە دواكەوتنی مووچە بۆ ئەوەی قوتی هاوڵاتیان بە سیاسی نەكرێت".

دەقی بانگەوازەكە:
بانگەوازێك بۆ هەردوو بەڕێزان وەزیری دارایی و سامانە سروشتییەكان
" چارەنووسی مووچەی نەدراوی فەرمانبەران و لایەنی بەرپرسی  دەبێت روونببێتەوە"

ئەگەرچی  زیاتر لە ساڵێك و چوار مانگە كابینەی هەشتەمی حكومەتی هەرێم دەستبەكاربووە، تاوەكو ئێستا قەیرانی دواكەوتنی مووچەی فەرمانبەرانی هەرێم سەرباری دەیان گرفت و قەیرانەكانی  تر چارەسەر نەكراوە، بەم دواییانە گرفتی دواكەوتنی مووچەی فەرمانبەران زیاتر  بووە  و هەر یەكە لە وەزارەتەكانی دارایی و سامانە سروشتییەكان یەكتری تۆمەتبار دەكەن بە هۆكاری دواكەوتنی مووچە و تاوەكو ئێستاش بۆ ئێمەی پەرلەمانتاران و هاوڵاتیان هۆكاری راستەقینەی ئەو قەیرانە یەكلا نەبووەتەوە.

لەم قۆناغەدا بە پێویستی دەزانین كە بانگەوازی  هەریەكە لەو دوو بەڕێزە بكەین بۆ بەرنامە و دیبەتێك بە ئامادەبوونی كەناڵەكانی راگەیاندن بۆ ئەوەی بە راشكاوانە بەڵگەكاكانیان بخەنەڕوو كە داخۆ كێ بەرپرسە لە دواكەوتنی مووچە بۆ ئەوەی قوتی هاوڵاتیان بە سیاسی نەكرێت.