ئاماژه‌ به‌وه‌ش ده‌كات: "ئه‌گه‌ر ده‌مانه‌وێ‌ هه‌رێمه‌كه‌مان به‌ره‌ و هه‌ره‌س‌ وداڕمان نه‌چێ‌، با هه‌رچی زووتره‌ قۆڵی لـێ‌ هه‌ڵكه‌ین ‌و كۆتایی به‌ سه‌رجه‌م جۆره‌كانی سته‌م بێنین."

ده‌قی په‌یامه‌كی م.عه‌لی باپیر ئه‌میری كۆمه‌لی ئیسلامی:

دادگەریی بناغەی تەباییەو، ستەمكاریی هۆكاری لێك جیاییە

لەم ڕۆژانەدا خەڵكی هەرێمی كوردستان بە بژاردەی سیاسیی‌و سەرجەم توێژەكانەوە سەرگەرمی باس‌و خواسی پێكەوە گونجان‌و سازانن‌و، نیگەرانی ناتەبایی‌و لێك ترازانن، منیش بەپێویستم زانی لەوبارەوە چەند دێڕێكی كورت بنووسم، بەمەبەستی دانانی چەند نیشانەو قوچكە (معالم)ێك بۆ ڕووشنكردنەوەی ڕێگای ڕاستەقینەی پێكەوە گونجان‌و تەبایی‌و سازان:
یەك:
تەبایی ڕاستەقینە لەنێو كۆمەڵگادا تەنیا لەسەر بناغەی دادگەریی (عدل) بنیات دەنرێ‌، هەربۆیەش خوای كاربەجێ‌ تێكڕای پێغەمبەرانی لە ئادەمەوە تا خاتەم "علیهم السلام" بۆ چەسپاندنی دادگەریی ناردوە: {لَقَدْ أَرْسَلْنَا بِالبَيِّنَاتِ وَأَنْزَلْنَا مَعَهُمُ الْكِتَابَ وَالْمِيزَانَ لِيَقُومَ النَّاسَ بِالْقِسْطِ...} الحديد -25-.
دوو: 
لەماوەی (24) ساڵی ڕابردوودا، ستەمی جۆراوجۆر لەهەموو بوارو ئاستەكاندا لە هەرێمەكەماندا بەرجەستە بووەو، دەستڕۆیشتوو و بڕیار بەدەستان، ئیرادەیەكی جیددییان نەخستۆتە گەڕ بۆ چاكسازیی ڕیشەیی‌و، بەرجەستەكردنی فاكتەرەكانی چەسپاندنی دادگەریی‌و، نەهێشتنی پێچەوانەكەی كە ستەمكارییە، وەك: بەدامەزراوە كردنی كاروبارەكان‌و، سەروەركردنی یاساو، مرۆڤبوون‌و هاووڵاتیی بوون كردنە پێوەرو، نەهێشتنی هەیمەنەی حیزب‌و گرووپ‌و كەس بەسەر حكوومەت‌و دام‌و دەزگاكانیدا، كە ماك‌و میكڕۆبی گەندەڵیی‌و قۆرخكاریی‌و... هتدە.
ســێ‌: 
هەڵبەتە ئەوەی كە بۆتە بپەرچ (مانع)یش لەڕێ‌ی چاكسازیی ڕیشەییدا، ئەو بەرژەوەندییە ستەمكارانەو ناشەرعییانەی ژمارەیەك لە بەرپرسان‌و، دەوروبەرە هەلپەرستەكەیان بوون، چونكە {ڕاوچی خراپ لەئاوی لێڵدا ڕاودەكات} و {دز بازاڕی ئاڵۆزی دەوێ‌}.
چـوار:
كەواتە ئەگەر دەمانەوێ‌ چارەسەری ڕیشەیی كێشەو گرفتەكانمان بكەین، با كۆتایی بەحاڵەتی ستەمكاریی‌و قۆرخكاریی‌و گەندەڵیی بێنین‌و، دڵنیابین كە بەبێ‌ دادگەریی مەحاڵە پێكەوە گونجان‌و تەبایی بەرقەراربێ‌، ئایا هیچ دیوارێك بەبێ‌ بناغە ڕادەوەستێ‌؟!
پـێـنـج: 
خوای كاربەجێ‌ لەچەندان ئایەتدا هەواڵی پێداوین كە بەهۆی ستەم‌و جیاكارییەوە كۆمەڵگاكان هەرەس دێنن، بۆ وێنە خوا فەرموویەتی: {...وَمَا كُنَّا مُهْلِكِي الْقُرَى إِلاّ وَأَهْلُهَا ظَالِمُون} القصص -59-، واتە: وەئێمە ئاوەدانییەكان نافەوتێنین، مەگەر خەڵكەكەیان ستەمكار بێ‌!
بۆیە ئەگەر دەمانەوێ‌ هەرێمەكەمان بەرەو هەرەس‌وداڕمان نەچێ‌، با هەرچی زووترە قۆڵی لـێ‌ هەڵكەین‌و، كۆتایی بەسەرجەم جۆرەكانی ستەم (ظلم) بێنین، هەنگاوی یەكەمیش ئەوەیە كە بەرپرسە باڵاو دەستڕۆیشتووەكان، لەخۆیان‌و خزم‌و نیزیك‌و دەوروبەریانەوە دەست پێ‌ بكەن‌و، چیدیكە قبووڵ نەكەن: كەسانی مشەخۆر لەپەنای ئەواندا سامانی حەڕام وەسەرێك بنێن‌و، سەرەنجام حكوومەت‌و وەزارەتەكانی هەژارو لات بكەون‌و، كەسانێكیش بەپارەی حەڕام ببنە ملیارد لێر!!
شەش: بێگومان پێكەوە گونجان‌و پێكگەیشتن‌و ڕێككەوتنیش، بەبێ‌ بۆ یەكدی دابەزین (تنازل) دەستەبەر نابێ‌‌و، دیارە دابەزین‌و خۆ نەوی كردنیش زیاتر لەوانە چاوەڕێ‌ دەكرێ‌، كە زۆر هەڵكشیون‌و چوونە سەرەوەو، پشكی زیاترو گەورەتریان لەلایە، ئەگەرنا كەسێك هیچی نەبێ‌، هیچ نابەخشێ‌ (فاقد الشيء لايعطيه).
بەدڵنیاییش ئەو باجەی كە بۆ تەبایی‌و ڕێككەوتن دەیدەین‌و، ئەوەی كە بۆ پێك گەیشتن دەستبەرداری دەبین، زۆر كەمترە لەوەی كە بەهۆی ناتەباییەوە لەدەستمان دەچێ‌.
حەوتەم:
لەكۆتاییدا هیوادارم هیچ كورسیی‌و پێگەوپایەیەك‌و، هیچ بەرژەوەندییەكی تایبەتیی‌و، هیچ گرێ‌‌و گرفتێكی ڕابردوو، نەتوانێ‌ بەسەر هەوڵ‌و هیممەتی دڵسۆزانی ئەم وڵات‌و خەڵكەدا زاڵ بێ‌‌و، سەرەنجام بتوانین لەسەر بناغەی دادگەرییەكی گشتگیر، تەبایی‌و یەكڕیزیی‌و یەكڕەنگییەكی مەحكەم‌و پتەو، لەهەرێمەكەماندا بێنینەدی، وەخەڵك‌و جەماوەرە بەدەست چەندان كێشەو قەیرانەوە گرفتارەكەمان، بەگشتیی‌و، پێشمەرگە فیداكارە وڵات‌و دین‌و ژین پارێزو خۆڕاگرەكانمان، بەتایبەت، دڵخۆش بكەین‌و لەسەرەوەی هەمووكەسیشەوە، خوای كاربەجێ‌‌و دادگەر لەخۆمان ڕازی بكەین.
عــەلــی بــاپــیــر
6/ زولقەعیدە 1436 كـ
21/8/2015 ز
هەولێر