حەبیبوڵا سەیاری، فەرماندەی ھێزە دەریاییەکانی ئێران لەمیانەی بەشداریکردنی لە (١٩)هەمین مانۆڕی کەشتی جەنگی لە پارێزگای خوزستان ڕایگەیاند کە ئامانجی ئەوان لە هەبوونی کەشتیە جەنگیەکانیان لە کەنداوی عەدەن و گەروی باب ئەلمەندەب پاراستنی کەشتیە بازرگانیەکانی وڵاتەکەیانە لە ناوچەکەدا.

سەیاری جەختى لەوەشکردوە کە کەشتیە جەنگیەکانى ئێران ئەرکیان پاراستنە، دەنگۆی کشانەوەی ئەو کەشتیانوشى لەو ناوچانە رەتکردوەتەوە .

لەبەرامبەردا ئەمەریکا کەشتی فڕۆکە هەڵگری تیودۆر رۆزفلت – ی ڕەوانەی هەرێمەکە کردوە و دەنگۆی ئەوەش هەیە کە قەیرانی یەمەن کاریگەری لەسەر دانوسانەکانی ئێران و وڵاتانی ڕۆژئاوا کردوە.

دوای قەیرانی یەمەن و ئۆپەراسیۆنی هاوپەیمانی عەرەبی بۆسەر حوسیەکان بەسەرۆکایەتی عەرەبستانی سعودی ، تاران ژمارەی کەشتیە جەنگیەکانی لە کەنداوی عەدەن و باب ئەلمەندەب زیاتر کردوە، تا ئێستا زیاتر لە ٣٠ کەشتی جەنگی رەوانەی ئەو ناوچە ئاویانە کردوە و ئەوەش نیگەرانی جیهان بەتایبەی وڵاتانی کەنداوی لێکەوتوەتەوە.