شا عەبدوڵای دووەم پادشای ئوردن ئامادەیی وڵاتەکەی بۆ بەشداریکردن لەو پرۆسە سەربازییانەدا دەربڕی کە بڕیارە سوپای عێراق بۆ رزگارکردنەوەی ھەردوو پارێزگای موسڵ و ئەنبار لە دەستی داعش ئەنجامیان بدات.

شا عەبدوڵا لە پەیوەندییەکی تەلەفۆنیدا لەگەڵ حەیدەر عەبادی، وێڕای دەربڕینی ئەو ھەڵوێستەی، پیرۆزبایی ئەو سەرکەوتنانەشی لە عەبادی کردووە کە ھێزە ئەمنییەکانی عێراق لە سەڵاحەدین و تکریتدا بەدەستیان ھێناوە.

ھەر لەو پەیوەندییە تەلەفۆنییەدا جگە لە گفتوگۆکردن لەبارەی دوایین ھەوڵەکانی بەرەنگاربوونەوەی داعش، پتەوکردنی پەیوەندییەکانی نێوان بەغدا و عەممان و بارودۆخی سیاسی و ئەمنی عێراق و ناوچەکەش تاووتوێکران.
جێی ئاماژەیە ئوردن یەکێکە لە پێکھێنەرانی ھاوپەیمانێتییە نێودەوڵەتییەکەی دژی داعش و مانگی شوباتی رابردووش لە تۆڵەی سووتانی فڕۆکەوانێکی لەلایەن داعشەوە ھەڵمەتێکی ئاسمانیی فراوانی کردە سەر مۆڵگەکانی ئەو تاقمە لە عێراق و سوریا، کە بە وتەی لێپرسراوانی سەربازیی ئوردن، توانیویانە رێژەی ٢٠%ی توانا سەربازییەکانی داعش تێکبشکێنن.