عەلی حەمەساڵح پارلەمانتاری بزووتنەوەی گۆڕان لە بابەتێكیدا كە لە پەیجی تایبەتی خۆی لە تۆڕی كۆمەڵایەتی بڵاویكردەوە دەڵێت "ئه‌و‌ هاوسۆزیه‌ی من هه‌مبوو بۆ ئه‌م دوو پارته‌ ئیسلامیه‌ له‌ جێی خۆیدا نه‌بوو"، و تۆمەتباریان دەكات بەوەی "له‌ هه‌موو قسه‌و به‌ڵێنانەكان‌ پاشگه‌زبوونه‌وه" كە پێشتر لەبارەی پشتیوانیكردنی گۆڕان بۆ وەرگرتنی پۆستی پارێزگار بە حزبەكەیانیان دابوو.
پارلەمانتارەكەی گۆڕان پێیوایە "کۆمه‌ڵ و یه‌کگرتوو گه‌وره‌ترین خزمه‌تیان کرد به‌ یه‌کێتی".
عەلی حەمەساڵح لەبەشێكی دیكەی پۆستەكەی هێرشەكەی بۆ سەر یەكگرتوو و كۆمەڵ توند دەكات و دەڵێت: ئەو دوو حزبە ئیسلامییە "‌تەنانه‌ت نه‌یانتوانی به‌ئه‌رکی دینی خۆیان هه‌ڵسن و موسوڵمانێکی وەك  د.هه‌ڤاڵ دیاری بکه‌ن" بۆ پۆستی پارێزگار.
دواتریش بە "بێ هەڵوێست" وەسفیان دەكات و دەڵێت : "به‌هۆی بێ هه‌ڵوێستیان شه‌ش مانگه‌ یه‌کێتی حوکمی ١٠٠٪ سلێمانی ده‌کات، کاکه‌ ئێوه‌ بێلایه‌ن نه‌بوون بێلایه‌نی ئه‌و کاته‌ ده‌بوو که‌ گۆڕان و یه‌کێتی وه‌ک یه‌ک له‌ حوکمدابن نه‌ک یه‌کیان حاکمی موتڵه‌ق و ئه‌وه‌که‌ش هیچ".
لەكۆتایی دا عەلی حەمە ساڵح پارلەمانتاری گۆڕان دەڵێت: "یه‌کگرتوو و کۆمه‌ڵ گه‌وره‌ترین دیاریان پێشکه‌ش یه‌کێتی کردو به‌مه‌ش له‌ هه‌ڵگرتنی ئه‌و به‌رپرسیاریه‌تیه‌ بۆ دونیاو قیامه‌ت سه‌رکه‌وتوو نه‌بون".