هەواڵ

پەروەردە: بۆ راگرتنی مەلزەمە پێویستە وەزارەتی ناوخۆ و رۆشنبیرییش بێنەسەرخەت


بزاڤــ:

لقی سلێمانی كۆمەڵەی خوێندكارانی كوردستان لە بەیاننامەیەكدا، كە ئاراستەی بەڕێوەبەرایەتی پەروەردەی رۆژئاوای سلێمانی كردوە، داوا دەكات رێگە بگیرێت لە ساغكردنەوەی مەلزەمە بەسەر خوێندكاراندا بەتایبەتی قۆناغی 12ی ئامادەیی.

لە بەیاننامەكەدا ئاماژە بەوەكراوە، كە دروستكردنی مەلزەمە و ساغكردنەوەی بەسەر خوێندكاراندا بەپێی یاسای وەزارەتی پەروەردە قەدەغەیە، بەڵام ساڵانە و رۆژبەڕۆژ لە تەشەنەسەندندایە و لە حاڵەتەوە بۆتە دیاردە بە تایبەتی بۆ قۆناغی 12ی ئامادەیی، ئەوەش كاریگەری خراپی كردۆتەسەر دەرونی خوێندكاران و نیگەرانی لا دروستكردون، هەروەها لە رووی داراییەوە بارگرانی بۆ كەسوكاری خوێندكاران دروستكردوە، خوێندكارانیشی لە بەكارهێنانی كتێب دورخستۆتەوە.

لەوبارەیەشەوە مامۆستا بەكر محەمەد  بەڕێوەبەری پەروەردەی رۆژئاوای سلێمانی لە پرێس كۆنفرانسێكدا وتی "پێویستە بەدەر لە وەزارەتی پەروەردە، وەزارەتی دیكەش بێنەسەرخەت وەك وەزارەتی ناوخۆ و وەزارەتی رۆشنبیری، چونكە مامۆستاكان لە رێگەی چاپخانەكانەوە مۆڵەتی چاپكردنی كتێب وەردەگرن و دواتر مەلزەمە چاپ دەكەن، چاپخانەكانی سلێمانی-یش بە ئاشكرا ئەو كارە دەكەن و وەزارەتی ناوخۆ لێی بێدەنگە".

وتیشی "بەپێی بەدواداچونی بەڕێوەبەرایەتیمان، ساڵانە بەمەبەستی چاپكردنی مەلزەمە، زیاتر لە 900 هەزار دۆلار بەسەر خوێندكاراندا ساغدەكرێتەوە".

هەر لە پرێس كۆنفرانسەكەدا، هێمن فەریق لێپرسراوی لقی سلێمانی كۆمەڵەی خوێندكارانی كوردستان وتی "پاڵپشت بە سكاڵا و نیگەرانی خوێندكاران لە بەرانبەر ساغكردنەوەی مەلزمە لەلایەن چەند مامۆستایەكەوە، پار ساڵ هەنگاوەكان بۆ بەرگرتن لەو كارە نرا، بەڵام بەهۆی بایكۆت و زیادنەكردنی فشار بۆسەر خوێندكار خرایە ئەمساڵ، كە بەشێوەیەكی فراوانتر و لەڕێگەی ئامادەكردنی یاداشتەوە كارەكانمان ئەنجام دەدەین".

وتیشی "پاش ئەنجامدانی كۆبونەوە لەگەڵ نوێنەرانی خوێندكاران لە خوێندنگە جیاجیاكاندا، یاداشتەكەمان لە چەند خاڵێكدا چڕكردۆتەوە، لەوانەش كاریگەری ساغكردنەوەی ئەو مەلزەمانە لەسەر دەرونی خوێندكار و دورخستنەوەیان لە كتێب، كە ساڵانە لەلایەن وەزارەتی پەروەردەوە بودجەی بۆ تەرخان دەكرێت، دروستكردنی بارگرانی دارایی بۆسەر كەسوكاری خوێندكاران".


‌‌‌
11/18/2018 12:53:24 PM
Print Friendly and PDF
زۆرترین بینراو
  • 24 کاتژمێر
  • هەفتە
  • مانگ