هەواڵ

موچەی پەرلەمانتارێکی بەغدا بەرامبەرە بە موچەی چەند مامۆستا؟



بزاڤــ : پێشەوا شێخ ڕەئووف

بەپێی شیکارییەکی ماڵپەڕی بـزاڤ، موچەی یەک پەرلەمانتاری حکومەتی عێراق بریتییە لە ۷ ملیۆن و ٦۰۰ هەزار دینار، بەمەش موچەی هەر پەرلەمانتارێک بەبێ پاسەوانەکانی بەرامبەرە بە موچەی ۱۹ نۆزدە مامۆستای تازە دامەزراو کە موچەکەی بریتی بێت لە ٤۰۰ هەزار دینار.

وەکو زانراوە هەر پەرلەمانتارێکی عێراق ۱٦ پاسەوانی هەیە، هەر پاسەوانێک موچەکەی بڕی ملیۆنێک و ٦۲ هەزار دینارە، واتا کۆی موچەی پاسەوانەکانی یەک پەرلەمانتار دەکاتە ۱٦٫۹۹۲٫۰۰۰ شانزە ملیۆن و نۆسەدو نەوەدو دوو هەزار دینار.

بەم پێیەش بێت کۆی ئەو موچەیەی دەدرێت بە یەک پەرلەمانتارو پاسەوانەکانی بریتییە لە ۲٤٫٥۹۲٫۰۰ بیست و چوار ملیۆن و پێنج سەدو نەوەدو دوو هەزار دینار لەیەک مانگدا، ئەمەش دەکاتە موچەی ٦۱٫٤۸مامۆستای تازە دامەزراو کە موچەکانیان تەنها ٤۰۰٫۰۰۰چوارسەد هەزار دیناربێت.

بەم شیکارییە بۆمان ڕووندەبێتەوە کە موچەی یەک پەرلەمانتارو پاسەوانەکانی لەیەک مانگدا زیاترە لەموچەی ٦۱ مامۆستای تازە دامەزراو.

هەروەها ئەو پارەیەی دەدرێتە پەرلەمانتارێک و پاسەوانەکانی لەماوەی ساڵێکدا بریتییە لە ۲۹٥٫۱۰٤٫۰۰۰ دووسەدو نەوەدو پێنج ملیۆن و سەدو چوار هەزار دینار.

ئەگەر سەرجەم ئەو موچانە لەماوەی هەر چوار ساڵەکەدا هەژماربکەین کە پەرلەمانتارێک و پاسەوانەکانی لەماوەی خولێکی چوار ساڵەی پەرلەماندا وەری دەگرن ئەوا دەکاتە ۱٫۱۸۰٫٤۱٦٫۰۰۰ یەک ملیارو سەدو هەشتا ملیۆن و چوارسەدو شانزە هەزار دینار، کەدەکاتە موچەی ۲٫۹٥۱ وو هەزارو نۆسەدو پەنجاو یەک مامۆستای تازە دەمەزراو کە موچەکانیان بریتی بێت لە ٤۰۰٫۰۰۰ چوارسەد هەزار دینار.


‌‌‌
10/10/2018 8:08:05 PM
Print Friendly and PDF
زۆرترین بینراو
  • 24 کاتژمێر
  • هەفتە
  • مانگ