هەواڵ

هادی عەلی: زۆرینەی یەکگرتوو لەگەڵ ئەوەدان بەشداری پەرلەمان نەکەین


بزاڤــ:

هادی عەلی سەرۆکی ئەنجومەنی سیاسی یەکگرتووی ئیسلامی کوردستان ئاشکرایکرد زۆربەی کادیرە باڵاکان و ڕێکخستنەکانی یەکگرتوو لەگەڵ ئەوەدان بەشداری پەرلەمان نەکەن.

لە لێدوانێکدا بۆ دەنگی ئەمریکا هادی عەلی روونیکردەوە، لە چەند ڕۆژی داهاتوودا یەکگرتوو ڕاپرسی لەناوخۆی حیزب ئەنجام دەدات لەبارەی ئەوەی بەشداری لە پەرلەمان بکەن یاخود بەشداری نەکەن.

ناوبراو دەشڵێت "بەدورری دەزانم بەشداری کابینەی حکومەتی هەرێم بکەین و دانمان بەوەدا ناوە بەشێک لە هۆکاری کەمبوونەوەی دەنگەکانمان پەیوەندی بەدۆخی ناوخۆی حیزبەکەمان و ئەدای قیادی و هەندێک لەگوتاری سیاسی و هەڵوێستەکانمانەوە هەیە لەچەند ساڵی ڕابردوودا."

ئاماژەی بەوەشکردووە، لەم مانگەدا یەکگرتوو کۆبوونەوەی فراوان ئەنجامدەدات و لەوێ گۆڕانکاری و دەسلەکارکێشانەوە لەپۆستەکاندا دەکرێت، وە بەهەڵوێستە سیاسیەکانی خۆیاندا دەچنەوە.

وتیشی " پارتی و یەکێتی مانایەکیان بۆ دیموکراسی نەهێشتووەتەوە، ئێمە بەتەنها بەرگری لەدەنگی خۆمان ناکەین بەڵکو ئەوە وایکردووە دەنگی لایەنەکانی تریش کەم بکاتەوە، وە متمانەی هاوڵاتیان بەپڕۆسەی هەڵبژاردن نەمێنێت، ئەمەش مەترسیەکی گەورەیە لەسەر پڕۆسەی دیموکراسی."

دووپاتیکردەوە، ئەگەر لایەنەکانی دەرەوەی دەسەڵات نەچنە ناو پەرلەمان و پڕۆسەی سیاسی، ئەوا کاریگەری زۆری دەبێت لەسەر "میسداقیەت"ی پڕۆسەی دیموکراسی لەهەرێمی کوردستان، لایەنەکانی دەسەڵات ناچار دەبن بەخۆیاندا بچنەوە، ناوەندە نێودەوڵەتییەکان دەبێت بەشێوەیەکی تر مامەڵە لەگەڵ دۆخەکەدا بکەن.

لە بەشێکی دیکەی قسەکانیدا، هادی عەلی راشیگەیاند، بیروڕا گۆڕینەوە لەگەڵ گۆڕان و کۆمەڵ هەیە سەبارەت بە بڕیاروەرگرتن هەم لەبارەی بەغدا هەم لەبارەی کوردستان بەڵام هێشتا نەگەیشتووەتە ئەوەی بڕیارێکی هاوبەش وەربگیرێت.

ئەوەش لەکاتێکدایە رۆژی ٦ی ئەم مانگە، یەکگرتوو ئەنجامی سەرەتایی هەڵبژاردنی پەرلەمانی کوردستانی رەتکردەوە.

رۆژی ٣٠ی ئەیلولی رابردوو هەڵبژاردنی پەرلەمانی کوردستان بەڕێوەچوو و ئێوارەی رۆژی پێنجشەممەش (٤ی تشرینی یەکەمی ٢٠١٨) کۆمسیۆنی باڵای سەربەخۆی هەڵبژاردن و ڕاپرسی هەرێمی کوردستان ٨٥%ی ئەنجامی بەرایی هەڵبژاردنەکەی بڵاوکردەوە.

پێشتریش جووڵانەوەی نەوەی نوێ ڕایگەیاند، ئەگەر ئەنجامەکە بەمشێوەیەی ئێستا بمێنێتەوە، بایکۆتی خولی پێنجەمی پەرلەمانی کوردستان دەکەن.


‌‌‌
10/9/2018 11:27:06 AM
Print Friendly and PDF
زۆرترین بینراو
  • 24 کاتژمێر
  • هەفتە
  • مانگ