هەواڵ

هەر سێ چەكدارەكەی ناو بینای پارێزگای هەولێر كوژران


بزاڤ :

بەگوێرەی زانیارییەكا هەر سێ چەكدارە هێرشبەرەكەی ناو بینای پارێزگای هەولێر كوژراون و سێ بارمتەش پێشوەخت رزگاركراون، بەڵام بەردەوام دەنگی تەقە لەناو بیناكەدا دەبیسترێت.

كاتژمێر 8:10 خولەكی بەیانی ئەمڕۆ سێ چەكدار هێرشیان كردەسەر بینای پارێزگای هەولێر و پاش برینداركردنی پۆلیسێك، چونە ناو بیناكەوە و خۆیان تێدا مەڵاس دا.

پاش گەمارۆدانی بیناكە و دروستبونی روبەڕوبونەوە لەنێوان هێزەكانی ئاسایش و چەكدارەكان، پاش زیاتر لە 3 كاتژمێر، هەر سێ چەكدارەكە كوژران و بینای پارێزگای هەولێریش پشكنینی زیاتری تێدا دەكرێت تا بەتەواوەتی كۆنترۆڵ بكرێت.

بەگوێرەی زانیارییەكان، سێ كارمەندی پارێزگاش لەدەستی چەكدارەكان رزگاركراون، كە یەكێكیان برینداربوە و دووانەكەی دیكەش سەلامەت بون. كەسێكی دیكەش بە برینداری لەنێو بیناكە رزگاركراوە.

لە روبەڕوبونەوەكاندا، هێزەكانی ئاسایشپارێزی هەولێر چەكی سوك و مامناوەندییان بەكارهێناوە، هەروەك لەكاتی كێوماڵكردنی ژورەكانی پارێزگادا، دەنگی تەقینەوە بیستراوە.

سەبارەت بە ناسنامەی چەكدارەكانیش، تائێستا هیچ زانیارییەك نییە، تەنها ئەوە نەبێت نەبەز عەبدولحەمید قائیمقامی هەولێر بە ماڵپەڕی رۆژنامەی (شەرق ئەلئەوسەت)ی راگەیاندوە، چەكدارەكان سەربە رێكخراوی دەوڵەتی ئیسلامی (داعش)ن.


لەنێو تۆڕە كۆمەڵایەتییەكانیشدا وێنەی ئەو پۆلیسە بریندارە بڵاوكراوەتەوە، كە بەیانی ئەمڕۆ لە ساتەكانی سەرەتای پەلامارەكەدا برینداركراوە.


‌‌‌
7/23/2018 12:33:27 PM
Print Friendly and PDF