هەواڵ

هادى عامرى داوای لێبوردن لە گەلی عێراق دەکات


بزاڤ :
ئەمینداری گشتی ڕێکخراوی بەدر و سەرۆکی هاوپەیمانی فەتح داوای لێبوردن لە گەلی عێراق دەکات و دان بەشکستدا دەنێت.

لە میانی وتارێکدا هادی عامری ڕایگەیاند، "سەرقاڵى کێشمەکێشى ناوخۆ بوین و گەلمان بە برسێتى بەجێهێشت و دەبێت دان بەوەدا بنێین و من یەکەم کەسم دان بەوەدا دەنێم کە کەمتەرخەم بووم بەرامبەر گەلى خۆم و داوای لێبوردن دەکەم لەهەموو کەمتەرخەمییەک".

ئاماژەی بەوەش کرد، داوا لە هەموو کەسایەتییە سیاسییەکان دەکات دان بەو راستییەدا بنێن پێش ئەوەى ناچار بکرێن بەدانپێدانان.

ڕاشیگەیاند، "با پرۆسەى سیاسى راست بکەینەوە، یەکەمجار بەدانپێدانان و دووەم دروستکردنى حکومەتێکى خزمەتگوزار".

سەرۆکی هاوپەیمانی فەتح ئەوەشی خستەڕوو کە پشوودرێژی گەلی عێراق ماوەیەکی زۆری خایاندووە بەڵام ئەوان نەیانتوانیوە چاکسازی لەناو خۆیاندا دروست بکەن.

وتیشی، "خەڵک دوو پەیامیان بۆ ئێمە نارد، یەکەمیان بە بەشدارى نەکردن لەهەڵبژاردن و دووەم بە خۆپیشاندان و دەبێت باشى بخوێنینەوە، دوور لە تاوانبارکردنى بەوەى هى پاشماوەکانى بەعسە".

دووپاتیشیکردەوە، "دەبێت دان بەهەڵەدا بنێین و داننان بەهەڵە چاکەییە و دەبێت دان بنێین بەوەى کە کەمتەرخەم بووین بەرامبەر گەلى خۆمان و نەمانتوانى خزمەت و ژیانى شایستەی پێشکەش بکەین بەهۆى ململانێى ناوخۆییەوە".

ئەم لێدوانەی هادی عامری لە کاتێکدایە کە نزیکەی دوو هەفتەیە بەهۆی نەبوونی خزمەتگوزاری و کەمی ئاو و کارەبا خۆپیشاندان لە زۆربەی شارەکانى باشورى عێراق سەریهەڵداوە و لە دوا پەرەسەندندا خۆپیشاندەرانى بەسرە ڕێگاى کێڵگە نەوتییەکانیان گەمارۆدا، بۆ کۆنترۆڵکردنى ئەم ناڕەزایەتیانەش کە بۆ ماوەیەک جوڵەى فڕۆکەخانەى نەجەفیان پەکخست و بەرهەمهێنانى نەوتیان لە بەسرە خستە مەترسییەوە، حکومەتى عێراق کە حەیدەرعەبادى سەرۆکایەتى دەکات و ماوەى یاسایی کۆتاییهاتووە چەند ڕێوشوێنێکى ئەمنى و ئیدارى گرتەبەر و ئەگەریش هەیە لە چەند ڕۆژى داهاتوو گۆڕانکاریی جۆراوجۆر بەوهۆیەوە ڕووبدەن.


‌‌‌
7/19/2018 1:13:27 PM
Print Friendly and PDF
زۆرترین بینراو
  • 24 کاتژمێر
  • هەفتە
  • مانگ