هەواڵ

ڕاگەیەنراوێک لەپەرلەمانتارانی کوردستانەوە


بزاڤـ: 

ژمارەیەک پەرلەمانتاری کوردستان لەبارەی لەشکرکێشی سوپای تورکیا بۆ ناو خاکی ھەرێم داوای کۆبونەوەی نائاسایی پەرلەمان دەکەن و ڕایدەگەیەنن: ئیرادەی زیندوی گەل قبوڵی داگیرکاری ناکات.

دەقی راگەیەنراوەکە:

سەبارەت بە لەشکرکێشی تورکیا
لە ساڵانی رابردووداو تا ئەم ساتەوەختە چەندین جار نوێنەرانی گەل لەپەرلەمانی کوردستان بانگەوازمان ئاراستەی دەسەڵاتدارانی ھەرێم لە پەرلەمان و حکومەت و حزبە حوکمڕانەکان و دەسەڵاتی حکومەتی فیدراڵی عیراق کردوە، کە رێگری بکەن لە ھەنگاوەکانی سنور بەزاندنی سوپای تورکیا بۆ ناو خاکی ھەرێم. بەڵام بەدەنگەوە ھاتن نەبووەو، دەوڵەتی تورکیاش قۆناغ لەدوای قۆناغ پێگەی خۆی لەناو قوڵایی خاکی کوردستان لە دانانی چەندنی سەربازگەو مۆڵگەو جەندرمە خانە قایمتر دەکات. تا گەیشتۆتە ئەو ئاستەی جەندرمەی تورکیا لەگوندەکانی پارێزگای ھەولێر مانۆڕو نمایشی سەربازی دەکەن، وەک ئەوەی ئەوان خاوەن ماڵ بن!
لە رێگەی ئەم راگەیەنراوەوە ئەم مەترسیە بۆ سەر ئاسایشی ھەموو خاک و خەڵکی کوردستان رادەگەیەنین. پێویستە ھەموو لایەک ھەڵوێستی جدی و راشکاویان ھەبێ بۆ قبوڵنەکردنی ئەم ستەم و داگیرکاریەو دەرکردنی سوپای بێگانە لەخاکی ھەرێم و بێنە دەنگ بەرامبەر پێشێلکردنی یاسا ناوخۆیی و نێودەوڵەتیەکان.
پێویستە لایەنە سیاسیەکان بە راشکاوی دژی سیاسەتی تورکیا بوەستنەوەو سەربەخۆیی ئیرادەی خۆیان بپارێزن و نەکەونە داوی مەرامی داگیرکەرانی کوردستانەوە.
داواکارین و پێویستە پەرلەمانی کوردستان بەخێرایی دانیشتنی نائاسایی بکات و بانگەوازی دونیا بکا بۆ بەھاناوە ھاتنی کوردستان و حکومەت و لایەنەکانی کوردستانیش رابسپێرێ بە راپەڕاندنی ئەرکی پارێزگاری لە کوردستان.
بەتایبەتیش جێبەجێکردنی بڕیاری ژمارە (۳۷) ساڵی ۲٠٠۳ کە تایبەتە بە گەڕاندنەوەی سوپای تورکیا لەناو خاکی کوردستان. 
لەساڵانی رابردوو چەندین جار وڵاتی تورکیاو ئێران بەبیانوی نا لۆژیکی ئاسمان و زەمینی کوردستانیان بەزاندوەو خەڵکی سڤیلیان کردۆتە ئامانج و گوندنشینانیان دەربەدەرکردوە. 
بانگەواز بۆ حکومەت و پەرلەمانی ئیتحادی و ھەرێم دەکەین مەسئولیەتی سەرشانیان راپەڕێنن بۆ ناچارکردنی تورکیا لە چۆڵکردنی ئەو ناوچانەی بۆی ھاتوون.
داوا لە کونسوڵخانەی وڵاتان لەھەولێرو نەتەوە یەکگرتوەکان دەکەین رۆڵیان ھەبێ لە پارێزگاریی کوردستان.
ئەوەی رووی داوە لە رابردوودا داگیرکاریەکی شاراوە بوەو، ئەوەی ئێستا روو دەدات لەمانۆڕی سەربازی تورکیا دەستپێکی راگەیاندنی داگیرکاریی ئاشکرای ھەرێمی کوردستانە. لێدانە لە ئیرادەی زیندووی گەل کە قبوڵی داگیرکاری ناکات. بەداخەوە ئیرادەی سیاسی و حوکمڕانی کوردستان چاوپۆشی کردوەو دەیکات
لەو زوڵم و داگیرکاریە، پێویستە گەلەکەمان وشیاتربێ و بەھەموو میکانیزمێکی خەباتی مەدەنی و چالاکی سیاسی لەناوەوەو دەرەوەی کوردستان دژی ئەم پێشێلکاریانەی دەوڵەتی تورکیا بۆ سەر باشوری کوردستان بوەستنەوە.

کۆمەڵێک لەپەرلەمانتارانی کوردستان
۱/٦/۲٠۱۸
۱_ سالار مەحمود
۲_ عەلی حمەساڵح
۳_ ئەبو کاروان
٤_ گەشە دارا حەفید
٥_ بێستون فایەق
٦_ نەجیبە شێخ لەتیف
۷_عومەر عینایەت حمەسعید
۸_ بەھار عەبدولرەحمان
۹_ د رێواز فایەق حسێن
۱٠_ د شێرکۆ حمەئەمین
۱۱_ ئەبوبەکر ھەڵەدنی
۱۲_ شکریە ئیسماعیل مستەفا
۱۳_ عەبدولرەحمان عەلی


‌‌‌
6/2/2018 5:48:19 PM
Print Friendly and PDF